मुंबई: अभिनेता सोहैल खान सध्या त्याच्या लूकमुळे सोशल मीडियावर चर्चेचा विषय बनला आहे. 'अलायन्स' या रिअॅलिटी शोच्या संपूर्ण टीमसाठी त्याने दिलेल्या पार्टीतील एका फोटोमुळे हा गदारोळ सुरू झाला आहे. एका इन्फ्लुएन्सरने शेअर केलेला हा फोटो पाहून चाहते थक्क झाले असून "सोहैलला नेमकं झालंय काय?" असे प्रश्न विचारत आहेत.
सलमान खानच्या भावाप्रमाणे सोहैलही त्याच्या फिटनेससाठी कायम ओळखला जायचा. मात्र 56 वर्षीय सोहैलचा पार्टीतील हा नवा फोटो पाहून नेटकऱ्यांनी वेगवेगळे अंदाज बांधायला सुरुवात केली.
काहींनी कमेंट करत म्हटले की, "हे एनाबॉलिक्स स्टेरॉइड्सचे साइड इफेक्ट्स असू शकतात किंवा जास्त दारूमुळे असं झालं असेल." तर काहींनी "ओझेम्पिकच्या ओव्हरडोसचा परिणाम" असंही म्हटलं आहे. एका यूजरने थेट लिहिलं, "म्हातारा माणूस म्हाताराच दिसणार ना."
दुसरीकडे, काही चाहत्यांनी याला सकारात्मक बाजू दिली. 'अलायन्स'च्या एका एपिसोडमध्ये सोहैलने स्वतः सांगितले होते की त्याने 12 किलो वजन कमी केले आहे. त्यामुळे वजन कमी झाल्यामुळे त्याचा चेहरा आणि शरीरयष्टी बदलली असावी, असा अंदाजही काहींनी व्यक्त केला.
सोहैल खानने बॉलिवूडमध्ये अभिनेता, दिग्दर्शक आणि निर्माता म्हणून स्वतःची ओळख निर्माण केली. 'मैंने दिल तुझको दिया', 'प्यार किया तो डरना क्या', 'हे बेबी', 'जय हो' सारख्या चित्रपटांमध्ये तो दिसला. दिग्दर्शक म्हणून 'प्यार किया तो डरना क्या' आणि 'हेलो ब्रदर' हे त्याचे गाजले सिनेमे आहेत. गेल्या काही वर्षात तो पडद्यावर कमी दिसला, पण 'अलायन्स' या रिअॅलिटी शोने त्याला पुन्हा एकदा चर्चेत आणले. या शोमध्ये त्याला प्रेक्षकांनी खूप पसंती दिली. विशेष म्हणजे या शोमध्ये त्याची माजी पत्नी सीमा सजदेह देखील स्पर्धक होती. घटस्फोटानंतरही दोघांमधील सलोखा आणि मैत्री पाहून प्रेक्षकांनी त्यांचे कौतुक केले. शोमध्ये दोघेही एकमेकांसोबत खूप समजूतदारपणे वागताना दिसले. एका पार्टीतील फोटोने सोहैल खान पुन्हा एकदा चर्चेत आला आहे. वजन कमी केल्यामुळे हा बदल आहे की अन्य काही कारण आहे, हे अद्याप स्पष्ट झालेले नाही. पण चाहत्यांच्या प्रतिक्रिया मात्र सोशल मीडियावर वेगाने व्हायरल होत आहेत.