तुम्ही दैनंदिन व्यवहारासाठी UPI पेमेंट, मोबाईल रिचार्ज किंवा बिल भरण्यासाठी Paytm ॲप वापरत असाल, तर तुमच्यासाठी एक अत्यंत महत्त्वाची बातमी आहे. दिल्ली उच्च न्यायालयाच्या आदेशानंतर, पेटीएम पेमेंट्स बँक (Paytm Payments Bank) बंद करण्याची अधिकृत प्रक्रिया सुरू झाली आहे. या बातमीमुळे अनेक युजर्समध्ये संभ्रम निर्माण झाला आहे, मात्र या कारवाईमुळे संपूर्ण 'Paytm ॲप' बंद होणार नाही, हे स्पष्ट करण्यात आले आहे.
काय सुरू राहणार आणि काय बंद होणार?
पेटीएम कंपनीने स्पष्ट केले आहे की, ग्राहकांना दिल्या जाणाऱ्या प्रमुख डिजिटल सेवा इतर बँकांच्या भागीदारीतून चालवल्या जातात. त्यामुळे पेटीएम पेमेंट्स बँक बंद झाली, तरी ग्राहकांच्या नेहमीच्या ऑनलाईन पेमेंट आणि रिचार्ज सेवांवर कोणताही परिणाम होणार नाही. युजर्स पूर्वीप्रमाणेच सुरक्षितपणे आपले व्यवहार सुरू ठेवू शकतात.