टाटा समूहाचे दिग्गज नोएल टाटा नोव्हेंबर २०२६ मध्ये व्होल्टास (Voltas) कंपनीच्या अध्यक्षपदावरून (चेअरमन) पायउतार होणार आहेत. त्यांनी मंगळवारी, ३० जून २०२६ रोजी झालेल्या कंपनीच्या ७२व्या वार्षिक सर्वसाधारण सभेत (AGM) ही अधिकृत घोषणा केली आणि भागधारकांना सांगितले की अध्यक्ष म्हणून ही त्यांची शेवटची एजीएम असेल.
(TATA GROUP)टाटा समूहाच्या नियमांनुसार, गैर-कार्यकारी संचालकांसाठी (Non-Executive Directors) वयोमर्यादा ७० वर्षे निश्चित करण्यात आली आहे. नोएल टाटा या वर्षी नोव्हेंबरमध्ये ७० वर्षांचे होत आहेत.त्यामुळे ते या पदावरून निवृत्त होत आहेत. व्होल्टासपूर्वी, २३ जून २०२६ रोजी झालेल्या टाटा समूहाची रिटेल कंपनी ट्रेंट (Trent) च्या ४७व्या एजीएममध्येही त्यांनी अध्यक्षपद सोडण्याची घोषणा केली होती. गेल्या आठवड्यात त्यांनी ट्रेंट आणि व्होल्टास या दोन मोठ्या कंपन्यांच्या एजीएम (AGM) मध्ये एकापाठोपाठ एक निवृत्तीच्या घोषणा केल्या आहेत.
आपल्या निरोपाच्या भाषणात नोएल टाटा यांनी सांगितले की, चालू आर्थिक वर्षात व्होल्टासच्या रूम एअर कंडिशनर्स (AC) व्यवसायाने अवघ्या ८१ दिवसांत १० लाख (१ दशलक्ष) युनिट्सच्या विक्रीचा टप्पा पार करून बाजारातील आपले अव्वल स्थान सिद्ध केले आहे. कंपनीने अंतर्गत बढती आणि बाहेरील अनुभवी लोकांच्या माध्यमातून नवीन पिढीचे नेतृत्व तयार केले आहे, जे कंपनीला पुढे घेऊन जाईल असा विश्वास त्यांनी व्यक्त केला.
व्होल्टासकडून नवीन अध्यक्षांची घोषणा नोव्हेंबरच्या सुमारास केली जाण्याची शक्यता आहे. ते व्होल्टास आणि ट्रेंटचे अध्यक्षपद सोडत असले, तरी ते टाटा सन्सचे सर्वात मोठे भागधारक असलेल्या टाटा ट्रस्ट्सचे (Tata Trusts) अध्यक्ष म्हणून कार्यरत राहतील. याशिवाय ते टाटा स्टील आणि टायटन कंपनीचे उपाध्यक्ष, तसेच टाटा इंटरनॅशनलचे अध्यक्ष म्हणूनही जोडलेले आहेत.