मुंबई : राज्याच्या राजकारणात उपमुख्यमंत्री सुनेत्रा पवार यांच्यावरून नवा वाद पेटला आहे. काँग्रेसने सोशल मीडियावर एक व्हिडिओ पोस्ट करत सुनेत्रा पवार यांना “गुंगी गुडिया” म्हणून हिणवले. “सुनेत्रा पवार अजून किती दिवस गुंगी गुडिया बनून राहतील” असा खोचक सवाल काँग्रेसने उपस्थित केला. काँग्रेसच्या या एका पोस्टमुळे राज्यभरात राजकीय वातावरण तापले असून सत्ताधारी पक्षाच्या नेत्यांनी एका सुरात याचा निषेध करत काँग्रेसला धारेवर धरले आहे.
गेल्या काही दिवसांपासून सुनेत्रा पवार या राज्याच्या उपमुख्यमंत्री म्हणून कार्यरत आहेत. त्यांच्या कामाबाबत आणि सार्वजनिक उपस्थितीबाबत विरोधकांकडून टीका होत असतानाच काँग्रेसने थेट त्यांच्या व्यक्तिमत्वावर शेरा मारला. काँग्रेसच्या अधिकृत सोशल मीडिया हँडलवरून टाकण्यात आलेल्या व्हिडिओत सुनेत्रा पवार यांना “गुंगी गुडिया” असे संबोधण्यात आले. यानंतर हा मुद्दा राजकीय वर्तुळात चर्चेचा विषय बनला. काँग्रेसच्या या विधानामुळे केवळ राष्ट्रवादीच नाही तर भाजप, शिवसेना शिंदे गट आणि इतर सत्ताधारी नेते देखील आक्रमक झाले आहेत.
काँग्रेसच्या टीकेला उत्तर देताना शिंदे गटाचे नेते दीपक केसरकर यांनी सर्वात आधी आवाज उठवला. “काँग्रेसला आपला इतिहास विसरला आहे का? इंदिरा गांधी पंतप्रधान झाल्यावर त्यांनाही गुंगी गुडिया म्हटले जायचे. महिला नेतृत्वाचा अपमान करणे हे काँग्रेसचे जुने धोरण आहे का?” असा सवाल केसरकरांनी केला.
मंत्री दत्ता भरणे यांनीही काँग्रेसचा खरपूस समाचार घेतला. “मी या विधानाचा निषेध करतो. सुनेत्रा पवार या केवळ अजित पवार यांच्या पत्नी नाहीत. त्या एक उत्तम उद्योजक आणि शेतकरी आहेत. त्यांचे मोठे सामाजिक कार्य आहे. महिलांचा सन्मान ही महाराष्ट्राची ओळख आहे. काँग्रेसने सुनेत्रा पवार आणि संपूर्ण महिला वर्गाची माफी मागावी,” अशी मागणी भरणेंनी केली.
भाजपचे मुख्य प्रवक्ते नवनाथ बन यांनी अधिक आक्रमक भूमिका घेतली. “गुंगी गुडिया कोण होते हे काँग्रेसच्या काळात देशाने बघितले आहे. मौनी बाबा कोण होते हे देखील काँग्रेसने आत्मपरीक्षण करून बघावे,” असा टोला त्यांनी लगावला.
राज्याचे मंत्री हसन मुश्रीफ म्हणाले, “अशा प्रकारच्या विधानांचा आम्ही धिक्कार करतो. इंदिरा गांधींनाही असेच बोलले गेले आणि नंतर त्यांनी काय करून दाखवले हे जगाला माहिती आहे. दादांच्या खांद्याला खांदा लावून सुनेत्रा पवारांनी सामाजिक काम केले आहे. राष्ट्रवादी काँग्रेस पक्ष या विधानाचा निषेध केल्याशिवाय राहणार नाही.”
शरद पवार गटाचे नेते रोहित पवार यांनी मात्र सावरासावर भूमिका घेतली. “या वक्तव्यावर मी सकारात्मक किंवा नकारात्मक काहीही बोलणार नाही. जर अजित दादांच्या पक्षाला ते चुकीचे वाटत असेल तर ते चुकीचेच आहे. इंदिरा गांधींनाही असेच म्हटले जायचे,” असे ते म्हणाले.
राष्ट्रवादीचे उपाध्यक्ष उदयकुमार आहेर यांनी काँग्रेसला थेट इशारा दिला. “सुनेत्रा वहिनींचा अपमान म्हणजे बारामतीकरांचा आणि पवार कुटुंबाचा अपमान आहे. शरद पवारांनी काँग्रेसला जाहीर माफी मागायला लावी, अन्यथा इंडिया आघाडीतून बाहेर पडावे,” अशी भूमिका आहेरांनी मांडली.
भाजपच्या माजी खासदार नवनीत राणा यांनी पृथ्वीराज चव्हाण यांचे नाव घेत टीका केली. “पृथ्वीराज चव्हाण यांचे वक्तव्य नीच आणि लाजिरवाणे आहे. एका कर्तृत्ववान महिलेचा अपमान करून काँग्रेसने आपली विकृत मानसिकता दाखवली आहे. त्यांनी तात्काळ माफी मागावी,” असे राणा म्हणाल्या.
सामाजिक कार्यकर्त्या अंजली दमानिया यांनीही नाराजी व्यक्त केली. “मी राष्ट्रवादीच्या विरोधात लढले आहे, पण सुनेत्रा पवारांसाठी वापरलेले शब्द चुकीचे आहेत. एका पक्षाला ही भाषा शोभते का?” असा सवाल त्यांनी उपस्थित केला.
ठाकरे गटाच्या किशोरी पेडणेकर यांनी थोड्या वेगळ्या पद्धतीने भाष्य केले. “सुनेत्रा वहिनींना बोलू दिले जात नाही का हे त्यांनी बघावे. त्या हुशार आहेत. पण त्यांनी गुंड प्रवृत्तीच्या लोकांना दूर सारले पाहिजे. वहिनी, तुमचा ठसा उमटवा,” असा सल्ला त्यांनी दिला.
शरद पवार गटाचे प्रवक्ते उमेश पाटील यांनी म्हटले की, “इंदिरा गांधींना गुंगी गुडिया म्हटले गेले आणि नंतर त्यांनी पाकिस्तानचे दोन तुकडे केले. सुनेत्रा वहिनींना पदभार घेऊन सहा महिनेही झाले नाहीत. काँग्रेसने असंवेदनशील वक्तव्य करून त्यांच्याच नेत्याची टिंगल उडवली आहे.”
ठाकरे गटाचे संजय राऊत यांनी मात्र यावर बोलण्यास नकार दिला. “मला याबद्दल काही माहिती नाही,” असे ते म्हणाले.
काँग्रेसच्या या पोस्टनंतर राजकारणात महिला नेतृत्वाच्या सन्मानाचा मुद्दा पुन्हा चर्चेत आला आहे. सत्ताधारी एकीकडे सुनेत्रा पवार यांच्या सामाजिक आणि राजकीय कामाचा दाखला देत आहेत, तर दुसरीकडे काँग्रेस त्यांच्या सार्वजनिक भूमिकेवर प्रश्न उपस्थित करत आहे. इंदिरा गांधींच्या काळातील “गुंगी गुडिया” हा उल्लेख पुन्हा समोर आणून सत्ताधाऱ्यांनी काँग्रेसला कोंडीत पकडण्याचा प्रयत्न केला आहे. सध्या या प्रकरणाचे पडसाद संपूर्ण राज्यात उमटत असून काँग्रेसने माफी मागावी अशी मागणी जोर धरत आहे. पुढील काही दिवसात इंडिया आघाडीच्या अंतर्गत बैठकांमध्ये या विषयावर चर्चा होण्याची शक्यता आहे.