देशभरातील घरगुती एलपीजी ग्राहकांसाठी केंद्र सरकारने एक अत्यंत महत्त्वाचा आणि दिलासादायक निर्णय घेतला आहे. आता ग्रामीण आणि शहरी दोन्ही भागांतील ग्राहकांसाठी गॅस सिलिंडर रिफिल बुक करण्यामधील अंतर २५ दिवस करण्यात आले आहे. केंद्रीय पेट्रोलियम आणि नैसर्गिक वायू राज्यमंत्री सुरेश गोपी यांनी सोमवारी या ऐतिहासिक निर्णयाची अधिकृत घोषणा केली.
या नवीन नियमामुळे आता ग्रामीण भागातील ग्राहकांना मोठा दिलासा मिळाला असून, देशभरात एलपीजी सिलिंडर वितरणाचा नियम एकसमान झाला आहे. पेट्रोलियम मंत्रालयाने इंडियन ऑईल भारत पेट्रोलियम आणि हिंदुस्तान पेट्रोलियम या तिन्ही प्रमुख तेल विपणन कंपन्यांच्या प्रमुखांना पत्र जारी करून हा निर्णय तात्काळ प्रभावाने लागू करण्याचे निर्देश दिले आहेत.
यापूर्वी २५ दिवसांचा हा नियम फक्त शहरी भागापुरता मर्यादित होता. ग्रामीण भागातील ग्राहकांना दोन सिलिंडर बुकिंगमध्ये तब्बल ४५ दिवसांचे अंतर ठेवावे लागत होते. त्यामुळे ग्रामीण भागातील कुटुंबांना मोठ्या अडचणींचा सामना करावा लागत होता. आता सरकारने हा दुजाभाव पूर्णपणे संपुष्टात आणला असून ग्रामीण भागाला २० दिवसांची मोठी शिथिलता दिली आहे.
मंत्रालयाने दिलेल्या माहितीनुसार, मध्य पूर्वेतील तणाव आणि युद्धसदृश परिस्थितीमुळे काही काळापूर्वी एलपीजी पुरवठ्यावर मोठा परिणाम झाला होता. त्या वेळी बाजारातील मागणी आणि पुरवठ्याचा ताळमेळ राखण्यासाठी, गॅसचा काळाबाजार रोखण्यासाठी आणि साठेबाजीला चाप लावण्यासाठी ग्रामीण भागात तात्पुरत्या स्वरूपात ४५ दिवसांचा प्रतीक्षा काळ निश्चित करण्यात आला होता.
पेट्रोलियम मंत्रालयाच्या आकडेवारीनुसार, आता देशातील एलपीजी पुरवठ्याची परिस्थिती लक्षणीयरीत्या सुधारली असून प्रलंबित मागणी जवळपास संपुष्टात आली आहे. पुरवठा साखळी पुन्हा पूर्वपदावर आल्याने सरकारने ग्रामीण भागातील नियमांमध्ये शिथिलता आणून सर्व ग्राहकांना एकाच पातळीवर आणण्याचा निर्णय घेतला आहे.