LIFESTYLE : आजकाल अनेक तरुण नोकरी किंवा शिक्षणासाठी एकटे राहणे पसंत करतात. काहींना लग्नानंतरही थोडा वेळ एकटे राहायला आवडते. मग प्रश्न पडतो, एकटे राहणारे लोक खरच जास्त आनंदी असतात का.
पहिला मुद्दा म्हणजे एकटेपणा आणि एकटे राहणे यात फरक आहे. एकटेपणा हा नकारात्मक भाव आहे, जिथे व्यक्तीला लोकांमध्ये राहूनही एकटे वाटते. तर एकटे राहणे ही एक निवड आहे, जिथे व्यक्ती स्वतःच्या इच्छेने स्वतःसाठी वेळ काढते. मानसशास्त्रज्ञ याला solitude असे म्हणतात.
अमेरिकेतील काही संशोधनानुसार जे लोक स्वतःच्या इच्छेने एकटे राहतात, त्यांच्यात self awareness जास्त असते. त्यांना स्वतःचे निर्णय स्वतः घेता येतात. सकाळी किती वाजता उठायचे, काय खायचे, पैसा कसा वापरायचा यावर दुसऱ्या कोणाचे बंधन नसते. यामुळे त्यांच्यात आत्मविश्वास वाढतो.
दुसरा फायदा म्हणजे मेंदूला विश्रांती मिळते. सतत लोकांमध्ये राहिल्याने, सतत बोलण्याने आपला मेंदू थकतो. एकटे राहिल्यावर तुम्ही तुमच्या छंदांना वेळ देऊ शकता. वाचन, संगीत, फिरणे, लिहिणे यासाठी वेळ मिळतो. याने तणाव कमी होतो.
पण याची दुसरी बाजू देखील आहे. माणूस हा समाजशील प्राणी आहे. जास्त काळ एकटे राहिल्याने काही लोकांमध्ये चिंता आणि उदासीनता वाढू शकते. जर दिवसभर कोणाशीही बोलणे झाले नाही, भावना कोणाला सांगता आल्या नाहीत, तर मनात नकारात्मक विचार येऊ लागतात. मग आनंदी कसे राहायचे.
मानसशास्त्रज्ञ सांगतात की आनंद हा एकटे राहणे किंवा सोबत राहणे यावर अवलंबून नसतो, तर तुम्ही ते कसे जगता यावर अवलंबून असतो.
जर तुम्ही एकटे राहत असाल तर तीन गोष्टी करा. एक, रोज किमान एका व्यक्तीशी मनापासून बोला, आई वडील किंवा मित्र असू शकतो. दोन, घराबाहेर पडा, रोज 30 मिनिटे चाला, लोकांमध्ये मिसळा. तीन, स्वतःसाठी एक रुटीन बनवा, वेळेवर जेवण, झोप आणि काम.
थोडक्यात, एकटे राहणे वाईट नाही, पण एकटे पडणे वाईट आहे. जर एकटे राहणे तुम्हाला स्वतःला ओळखायला मदत करत असेल, तुम्हाला शांत वाटत असेल, तर तुम्ही नक्कीच जास्त आनंदी असू शकता. पण जर त्यामुळे तुम्ही सगळ्यांपासून दूर जात असाल, तर वेळीच मित्र आणि कुटुंबाशी संपर्क वाढवणे गरजेचे आहे.