हिंगोली : महाराष्ट्रात आज सकाळी भूकंपाचे धक्के जाणवले आहेत. हिंगोली जिल्ह्यात आज शनिवारी सकाळी दोन वेळा जमीन हादरली आहे. त्यामुळे नागरिकांमध्ये भीतीचे वातावरण निर्माण झाले आहे.
पहिला भूकंपाचा धक्का आज सकाळी 7 वाजून 46 मिनिटांनी बसला. त्याची तीव्रता 3.3 रिश्टर स्केल होती. याचा केंद्रबिंदू औंढा नागनाथ तालुक्यातील गढला गावात होता. याची खोली 7 किलोमीटर होती. या धक्क्यासोबत मोठा आवाज देखील आल्याचे गावकऱ्यांनी सांगितले.
दुसरा आणि मोठा धक्का सकाळी 9 वाजून 43 मिनिटांनी बसला. नॅशनल सेंटर फॉर सिस्मॉलॉजी म्हणजे NCS ने दिलेल्या माहितीनुसार या भूकंपाची तीव्रता 4.5 रिश्टर स्केल इतकी होती. हा धक्का जास्त मोठा असल्याने हिंगोलीसह परभणी, नांदेड जिल्ह्यात देखील जाणवला. याची खोली 5 किलोमीटर होती.
सुदैवाने या भूकंपात कोणतीही जीवितहानी झालेली नाही. तसेच मालमत्तेचेही मोठे नुकसान झालेले नाही. जिल्हा आपत्ती व्यवस्थापन विभागाने याची माहिती दिली आहे. परंतु दोनदा धक्के बसल्याने नागरिक घराबाहेर पडले होते.
हिंगोली जिल्हा भूकंपाच्या झोन 3 मध्ये येतो. या भागात जमिनीखालील प्लेट्समध्ये हालचाल झाल्यामुळे असे धक्के बसतात. गेल्या काही महिन्यांपासून मराठवाड्यात भूकंपाचे प्रमाण वाढले आहे.
जिल्हाधिकाऱ्यांनी नागरिकांना घाबरून न जाण्याचे आवाहन केले आहे. अफवांवर विश्वास ठेवू नका. भूकंप आल्यास घराबाहेर मोकळ्या जागेत जा. NCS ने अधिक माहितीसाठी BhooKamp App डाउनलोड करण्याचे सांगितले आहे.