अनेक घरांमध्ये थंडी किंवा पावसाळ्यात मुलांना गरम वाटावे म्हणून चहा दिला जातो. एकदा चव लागली की मुले रोज सकाळ संध्याकाळ आई वडिलांसोबत चहा मागू लागतात. पण ही सवय लहान मुलांच्या आरोग्यासाठी चांगली नाही. आहारतज्ज्ञांच्या मते 12 वर्षांपेक्षा कमी वयाच्या मुलांना चहा देणे टाळावे.
चहामध्ये टॅनिन नावाचा घटक असतो. टॅनिन शरीरात लोह शोषून घेण्याच्या प्रक्रियेत अडथळा आणते. सतत चहा प्यायल्याने मुलांमध्ये लोहाची कमतरता निर्माण होते. त्यामुळे मुले अॅनिमिक होतात, थकवा जाणवतो आणि अभ्यासात लक्ष लागत नाही.
लहान मुले खेळण्याच्या नादात पाणी कमी पितात. त्यातच चहा प्यायल्याने वारंवार लघवीला जावे लागते. चहामधील काही घटकांमुळे शरीरातील पाण्याचे प्रमाण कमी होते आणि डिहायड्रेशनचा त्रास वाढू शकतो.
चहामध्ये कॅफिन असते. लहान मुलांसाठी कॅफिन योग्य नाही. त्यामुळे मुले अस्वस्थ होतात, रात्री झोप लवकर येत नाही, जास्त रडणे, चिडचिड करणे आणि अॅन्झायटी सारखे त्रास दिसू शकतात.
चहामुळे लहान वयातच अॅसिडिटीचा त्रास सुरू होतो. पोटात जळजळ होणे, भूक न लागणे असे प्रकार घडतात. महत्वाचे म्हणजे चहामध्ये मुलांच्या वाढीसाठी लागणारे कोणतेही पोषणमूल्य नसते. त्यामुळे पोट भरल्यासारखे वाटले तरी शरीराला काहीच मिळत नाही.
दूध, कोमट पाणी, घरगुती सूप, नारळ पाणी हे चांगले पर्याय आहेत. थंडी वाजत असेल तर हळद घातलेले कोमट दूध द्यावे.
हा लेख सर्वसामान्य माहितीसाठी आहे. मुलांना कोणताही आहार बदलण्यापूर्वी बालरोगतज्ज्ञ किंवा आहारतज्ज्ञांचा सल्ला घ्या.