आरोग्य : सकाळी उठल्यापासून रात्री झोपेपर्यंत आपला हात मोबाईलवरच असतो. ऑफिसचे काम, रील्स पाहणे, मेसेज करणे या सगळ्यामध्ये आपण तासनतास मान खाली घालून बसतो. यामुळे आता एक नवीन आजार मोठ्या प्रमाणात समोर येत आहे ज्याचे नाव आहे टेक्स्ट नेक सिंड्रोम.
टेक्स्ट नेक म्हणजे काय -
आपले डोके सरळ असताना त्याचे वजन सुमारे 5 ते 6 किलो असते. पण जेव्हा आपण मान 15 अंश खाली झुकवतो तेव्हा मानेवर 12 किलोचा भार येतो. 30 अंश झुकवल्यास 18 किलो, 45 अंश झुकवल्यास 22 किलो आणि 60 अंश म्हणजे पूर्णपणे मान खाली घालून मोबाईल पाहिल्यास मानेवर तब्बल 27 किलोचा भार पडतो. हाच सततचा भार मणक्याचे आजार निर्माण करतो.
लक्षणे कोणती -
सतत मान दुखणे आणि आखडणे, खांदे जड होणे, डोकेदुखी विशेषतः मागच्या बाजूला दुखणे, पाठीच्या वरच्या भागात वेदना, कधी कधी हाताला मुंग्या येणे किंवा बधीरता जाणवणे, चक्कर येणे ही या आजाराची मुख्य लक्षणे आहेत. सुरुवातीला फक्त थकवा वाटतो पण नंतर ही वेदना कायमची होऊ शकते.
हा आजार कोणाला होऊ शकतो -
अगोदर हा आजार फक्त आयटी क्षेत्रातील लोकांमध्ये दिसायचा पण आता शाळेतील मुले, कॉलेजचे तरुण, गृहिणी आणि दिवसातून 4 तासांपेक्षा जास्त मोबाईल वापरणारे सर्वजण याच्या विळख्यात आहेत. भारतात दर 10 पैकी 7 तरुणांना मानदुखीची तक्रार आहे त्यामागे टेक्स्ट नेक हे प्रमुख कारण आहे.
बचावासाठी काय करावे -
1. मोबाईल डोळ्यांच्या लेव्हलवर धरा - मोबाईल पाहताना तो खाली न ठेवता डोळ्यांसमोर धरा जेणेकरून मान सरळ राहील.
2. 20-20-20 चा नियम - दर 20 मिनिटांनी 20 सेकंद मान वर करून 20 फूट लांब पाहा.
3. सोपे व्यायाम - मान हळू हळू पुढे मागे आणि गोलाकार फिरवणे, खांदे वर खाली करणे, भिंतीला टेकून सरळ उभे राहून मान मागे टेकवणे हा व्यायाम दिवसातून दोन वेळा 2 मिनिटे करा.
4. झोपण्याची पद्धत - खूप उंच उशी वापरू नका, पातळ उशी वापरा आणि पालथे झोपून मोबाईल पाहू नका.
5. लॅपटॉप वापरताना - लॅपटॉप टेबलवर ठेवून खुर्चीची उंची अशी ठेवा की स्क्रीन डोळ्यांच्या समोर येईल.
कधी डॉक्टरांना भेटावे -
जर मानदुखी 3 दिवसांपेक्षा जास्त राहत असेल, हाताला मुंग्या येत असतील, मान आखडल्यामुळे वळवता येत नसेल तर त्वरित हाडांच्या किंवा फिजिओथेरपी डॉक्टरांना भेटा. वेळीच उपचार घेतल्यास हा आजार पूर्णपणे बरा होऊ शकतो.
आजपासूनच मोबाईल पाहण्याची सवय बदला आणि आपल्या मणक्याला वाचवा.