मुंबई : देशाचे भविष्य असलेल्या युवा पिढीसाठी शिक्षण व्यवस्थेतील प्रामाणिकपणा हा सर्वात महत्त्वाचा भाग आहे. अशातच आमदार *रोहित पवार* यांनी आज पत्रकार परिषद घेऊन MPSC च्या पेपर फुटी प्रकरणाचा थेट व्हिडिओ पुराव्यासह भांडाफोड केला आहे. त्यांच्या या दाव्यामुळे राज्यात एकच खळबळ उडाली आहे.
रोहित पवार यांनी पत्रकार परिषदेत खालील गंभीर आरोप केले:
1. 12 लाखाला विकली प्रश्नपत्रिका
"एका प्रश्नपत्रिकेची किंमत 12 लाख रुपये होती. त्यापैकी 5 लाख रुपये ऍडव्हान्स देण्यात आले होते आणि उर्वरित 7 लाख रुपये नंतर द्यायचे ठरले होते," असा दावा त्यांनी केला.
2. व्हॉट्सअपवर 2 दिवस आधीच पेपर लीक
FDA च्या औषध निरीक्षक पदाची परीक्षा 22 मार्च 2026 रोजी होती. मात्र त्याच्या 2 दिवस आधीच म्हणजे 20 मार्च रोजी व्हॉट्सअपवर प्रश्न पाठवण्यात आले होते.
3. "10 प्रश्न मुद्दाम चुकीचे सोडवा"
संशय येऊ नये म्हणून व्हॉट्सअप चॅटमध्ये उमेदवाराला 10 प्रश्न मुद्दाम चुकीचे सोडवायला सांगितले होते. यासंदर्भातील व्हॉट्सअप चॅटही आपल्याकडे असल्याचे पवारांनी सांगितले.
4. कट ऑफचा घोटाळा
"कट ऑफ 105 चा होता तरीही 103 मार्क मिळालेल्या एका उमेदवाराला मुलाखतीसाठी का बोलावले? यामागे कुणाचा दबाव होता?" असा थेट सवाल त्यांनी केला.
5. "पेपर सेट करणारा व्यक्तीच फुटला"
"NEET परीक्षेत पेपर सेट करणारा व्यक्ती फुटला होता. तसंच MPSC मध्ये देखील पेपर सेट करणारा व्यक्ती फुटला आहे. आता याचा आका कोण आहे? हे शोधलं पाहिजे," असे रोहित पवार म्हणाले.
त्यांनी दाखवलेल्या चॅटमध्ये उमेदवाराने 78 प्रश्न सोडवल्याचे आणि बाकीचे प्रश्न "मनाने" सोडवल्याचे सांगितल्याचेही त्यांनी नमूद केले.
रोहित पवार म्हणाले, "FDA ने चांगलं काम सुरू केलं आहे. पण पैसे देऊन औषध निरीक्षक झालेला अधिकारी पैसे वसूल करेल किंवा चांगल्या पद्धतीने काम करू शकणार नाही. केवळ पैसे देऊन पेपर फोडून पास झालेला अधिकारी जनतेला न्याय देऊ शकणार नाही."
या पत्रकार परिषदेनंतर महाराष्ट्रात मोठी खळबळ उडाली आहे. लाखो विद्यार्थी प्रामाणिकपणे अभ्यास करून परीक्षा देत असताना असा घोटाळा होणे ही युवा पिढीच्या भविष्याशी केलेली गद्दारी आहे, अशी प्रतिक्रिया उमटत आहे. "आमचा MPSC आयोगावर विश्वास आहे," असे सांगतानाच या रॅकेटमागील सूत्रधाराचा शोध घेण्याची मागणी रोहित पवार यांनी केली आहे. आता सरकार आणि MPSC आयोग या आरोपांवर काय भूमिका घेतात याकडे सर्वांचे लक्ष लागले आहे.