दिशा सालियान मृत्यू प्रकरणात आज, 2 सप्टेंबर 2026 रोजी मुंबई हायकोर्टाने सर्वात मोठा निर्णय दिला आहे. जस्टिस सारंग कोतवाल आणि रणजितसिंह भोसले यांच्या खंडपीठाने या प्रकरणाचा तपास थेट CBI कडे सोपवला आहे. कोर्टाने CBI ला FIR दाखल करण्याचे, सतीश सालियान यांचा जबाब नोंदवण्याचे आणि मालवणी पोलिसांकडून सर्व कागदपत्रे ताब्यात घेण्याचे आदेश दिले आहेत.
महत्त्वाची गोष्ट म्हणजे, कोर्टाने स्पष्ट केले आहे की तपासात ठोस पुरावे मिळाल्याशिवाय कुणालाही आरोपी म्हणून वागणूक देऊ नये. जर तपासात काहीच निष्पन्न झाले नाही, तर CBI क्लोजर रिपोर्ट दाखल करेल, पण त्याविरोधात सतीश सालियान यांना विरोध याचिका दाखल करण्याचा अधिकार असेल.
या निकालानंतर सतीश सालियान म्हणाले, "कोर्टाने योग्य निर्णय दिला, आता 100% न्याय मिळेल असा विश्वास आहे. 6 वर्षांपासून आम्ही लढत आहोत."
दिशा सालियान ही बॉलिवूड अभिनेता सुशांत सिंह राजपूतची माजी मॅनेजर होती. 8 जून 2020 रोजी रात्री मालाडमधील एका 14 मजली इमारतीवरून पडून तिचा मृत्यू झाला. याच्या अवघ्या 6 दिवसांनी म्हणजे 14 जूनला सुशांतचा मृत्यू झाला. त्यामुळे दोन्ही प्रकरणे चर्चेत आली.
मुंबई पोलिसांनी त्यावेळी फक्त Accidental Death Report (ADR) दाखल केला आणि तिला आत्महत्या म्हटले. पण वडिलांनी याचिकेत आरोप केला की, मुलीवर सामूहिक अत्याचार करून तिची हत्या करण्यात आली आणि राजकीय दबावामुळे हे प्रकरण दाबले गेले. त्यांच्या वकिलाने थेट शिवसेना (UBT) नेते आदित्य ठाकरे, सूरज पांचोली, दिनो मोरिया यांची नावे घेतली होती.