पुणे : महाराष्ट्राच्या सांस्कृतिक वारशाचा मानबिंदू असलेल्या गणेशोत्सवाला राज्य सरकारने राज्य महोत्सव म्हणून घोषित केले आहे. या उत्सवाच्या परंपरा आणि वैशिष्ट्ये जगासमोर आणण्यासाठी शासनाने Bappa.org हा अधिकृत डिजिटल मंच सुरू केला आहे. पुणे जिल्ह्यातील गणेशोत्सवाच्या अनोख्या परंपरांचे डिजिटल दस्तऐवजीकरण करून हा ठेवा पुढील पिढीसाठी जतन करावा, असे आवाहन जिल्हाधिकारी जितेंद्र डुडी यांनी केले आहे.
पुणे जिल्ह्याला मोठा ऐतिहासिक आणि सांस्कृतिक वारसा लाभला आहे. शहरातील मानाचे गणपती असोत किंवा ग्रामीण भागातील घरगुती गणेशोत्सव, प्रत्येक ठिकाणी वेगळी प्रथा आणि परंपरा जपली जाते. अनेक कुटुंबांमध्ये पिढ्यानपिढ्या चालत आलेल्या आरत्या, नैवेद्याच्या पाककृती आणि सजावटीच्या पद्धती आजही जपल्या जातात. या सर्वांचे जतन Bappa.org च्या माध्यमातून होणार आहे.
या उपक्रमामुळे पुणे जिल्ह्यातील गणेशोत्सवाचे वैभव राष्ट्रीय आणि आंतरराष्ट्रीय स्तरावर पोहोचणार आहे.