एका गरीब कुटुंबात कोणी आजारी पडले की पहिला प्रश्न पैशाचा येतो. खाजगी दवाखान्यात जावे तर लाख रुपयांचे बिल आणि सरकारी दवाखान्यात नंबरच लागत नाही. अशा वेळी अनेक लोक जमीन विकतात, कर्ज काढतात. पण महाराष्ट्र सरकारची एक अशी योजना आहे ज्यात गरीब कुटुंबावर 5 लाख रुपयांपर्यंतचे मोफत उपचार अगदी मोठ्या खाजगी हॉस्पिटलमध्येही होतात. त्या योजनेचे नाव आहे महात्मा ज्योतिराव फुले जन आरोग्य योजना. या योजनेची माहिती आजही 70 टक्के लोकांना माहिती नाही.
ही योजना पूर्वी राजीव गांधी जीवनदायी आरोग्य योजना म्हणून ओळखली जायची. आता तिचे नाव महात्मा फुले जन आरोग्य योजना झाले आहे. यात पिवळे आणि केशरी रेशन कार्ड असणाऱ्या कुटुंबांना वर्षाला 5 लाख रुपयांपर्यंत मोफत उपचार मिळतात. यात आता केंद्राच्या आयुष्मान भारत योजनेलाही जोडले आहे त्यामुळे लाभ अजून वाढला आहे. या योजनेत ऑपरेशन, कॅन्सर, हृदयाचे आजार, किडनी, अपघात, गुडघा प्रत्यारोपण असे 1356 पेक्षा जास्त आजार आणि शस्त्रक्रिया मोफत केल्या जातात.
या योजनेचा लाभ महाराष्ट्रातील सर्व पिवळे, अंत्योदय, अन्नपूर्णा आणि केशरी रेशन कार्ड धारकांना मिळतो. यासाठी उत्पन्नाचा दाखला लागत नाही, फक्त तुमचे रेशन कार्ड आणि आधार कार्ड पुरेसे आहे. शेतकरी, बांधकाम कामगार, रिक्षा चालक, रोजंदारी मजूर सगळ्यांना ही योजना लागू आहे. कुटुंबातील एका व्यक्तीचे नव्हे तर संपूर्ण कुटुंबाचे 5 लाखापर्यंतचे उपचार यात मोफत होतात.
यासाठी वेगळे कार्ड काढायची गरज नाही. तुमचे रेशन कार्ड हेच तुमचे आरोग्य कार्ड आहे. पण उपचार घेण्यापूर्वी तुम्हाला जवळच्या शासकीय रुग्णालयात किंवा जिल्हा कार्यालयात जाऊन पात्रता तपासून घ्यावी लागते. आता अनेक गावात आरोग्य मित्र बसलेले असतात. त्यांच्याकडे आधार कार्ड आणि रेशन कार्ड घेऊन गेल्यावर ते तुमचे नाव योजनेत आहे का ते लगेच सांगतात. तुम्ही 155356 या टोल फ्री नंबरवर फोन करूनही माहिती घेऊ शकता.
या योजनेत जिल्हा सरकारी रुग्णालय तर आहेतच पण पुणे, मुंबई, संभाजीनगर, नागपूर मधील अनेक नामांकित खाजगी हॉस्पिटलही आहेत. त्यामुळे तुम्हाला सरकारी दवाखान्यात गर्दीत उभे राहायची गरज नाही. तुम्ही थेट खाजगी हॉस्पिटलमध्ये जाऊनही मोफत उपचार घेऊ शकता.
1. उपचारासाठी जाताना नेहमी ओरिजनल रेशन कार्ड आणि आधार कार्ड सोबत ठेवा.
2. हॉस्पिटलने पैसे मागितले तर लगेच 155356 या टोल फ्री नंबरवर तक्रार करा.
3. या योजनेत आधीपासून असलेल्या आजारावरही उपचार मिळतात.
4. अपघात झाल्यास रेशन कार्ड नसले तरी आधार कार्डवर तात्पुरता उपचार मिळतो.
आज अनेक गरीब कुटुंबे फक्त माहिती नसल्यामुळे लाखो रुपयांचे कर्ज घेतात. हा लेख जास्तीत जास्त गरजू लोकांपर्यंत पोहोचवा. एका शेअरमुळे एखाद्या गरीब कुटुंबाचा जीव वाचू शकतो.