पुणे : पुणेकरांसाठी आजचा दिवस ऐतिहासिक ठरला आहे. पुण्यातील बहुप्रतिक्षित मेट्रो लाईन 3 म्हणजेच शिवाजीनगर ते हिंजवडी मेट्रोचे लोकार्पण आज पंतप्रधान नरेंद्र मोदी यांच्या हस्ते करण्यात आले. या सोहळ्याला मुख्यमंत्री देवेंद्र फडणवीस, दोन्ही उपमुख्यमंत्री आणि अनेक मान्यवर उपस्थित होते. या मेट्रोमुळे आयटी हब असलेल्या हिंजवडीला जाणाऱ्या लाखो कर्मचाऱ्यांचा प्रवास आता सुकर होणार आहे. या मेट्रोचे वैशिष्ट्य म्हणजे याचे भूमीपूजन देखील पंतप्रधान मोदींच्या हस्तेच झाले होते आणि आज उद्घाटनही त्यांच्याच हस्ते झाले. या कार्यक्रमात बोलताना मुख्यमंत्री देवेंद्र फडणवीस यांनी पुण्याच्या भविष्यातील विकासाचा रोडमॅप मांडला.
मुख्यमंत्री काय म्हणाले
मुख्यमंत्री देवेंद्र फडणवीस म्हणाले की, आज अतिशय आनंदाचा दिवस आहे. ज्या मेट्रोचे भूमीपूजन पंतप्रधान मोदींनी केले होते त्याच मेट्रोचे उद्घाटन आज त्यांच्या हस्ते होत आहे. ज्या प्रकल्पाचे भूमीपूजन मोदी करतात त्या प्रकल्पाचे उद्घाटनही तेच करतात असा त्यांचा विक्रम आहे. हा प्रकल्प पीपीपी मॉडेलवर तयार करण्यात आला आहे. यामध्ये केंद्र सरकारने मोठे सहकार्य केले आहे. हा प्रकल्प टाटा सन्स आणि सिमेन्स या दोन मोठ्या कंपन्यांच्या मदतीने पूर्ण झाला आहे. या दोन्ही कंपन्यांचे मी आभार मानतो. या मेट्रोमुळे पुण्यातील वाहतूक कोंडी मोठ्या प्रमाणात कमी होईल.
पिंक लाईन आणि महिला संचलित मेट्रो
फडणवीस यांनी सांगितले की, ही मेट्रोची पिंक लाईन आहे. या मेट्रोचे सर्वात मोठे वैशिष्ट्य म्हणजे ही मेट्रो पूर्णपणे महिला संचलित असणार आहे. हिंजवडीला पुण्याची आयटी राजधानी म्हटले जाते. दररोज लाखो लोक येथे कामासाठी येतात. त्यांना तासंतास वाहतूक कोंडीत अडकावे लागायचे. आता हा त्रास संपणार आहे.
पुणे होणार मोबिलिटी हब
मुख्यमंत्री पुढे म्हणाले की, पंतप्रधान मोदींच्या नेतृत्वात देशात 120 मेट्रो लाईनचे काम सुरू आहे. याचा सर्वात जास्त फायदा महाराष्ट्राला झाला आहे. देशात सर्वात मोठे मेट्रोचे जाळे महाराष्ट्रात आहे. राज्यातील 12 महापालिका क्षेत्रात मेट्रोचे काम सुरू आहे. ही महाराष्ट्रासाठी मोठी भेट आहे.
केंद्र सरकारने या प्रकल्पासाठी 5 हजार कोटी रुपयांची मदत केली आहे. 2030 पर्यंत पुणे, पिंपरी चिंचवड आणि पीएमआरडीए परिसर हा मोबिलिटीचा केंद्र बनणार आहे. पुणेकर एका ठिकाणाहून दुसऱ्या ठिकाणी अगदी सहज प्रवास करू शकतील. पुणे फक्त आयटी हब किंवा इकॉनॉमिक इंजिन राहणार नाही तर देशाचे तंत्रज्ञान केंद्र बनेल आणि भारताच्या अर्थव्यवस्थेला गती देईल.
या मेट्रोमुळे हिंजवडी, वाकड, बाणेर, शिवाजीनगर या मार्गावरील प्रवाशांना मोठा दिलासा मिळणार असून रोजगाराच्या नव्या संधीही निर्माण होणार आहेत.