कृषी : रब्बी हंगामाच्या तोंडावर केंद्र सरकारने शेतकऱ्यांसाठी MSP म्हणजेच किमान आधारभूत किंमत जाहीर केली आहे. पंतप्रधान नरेंद्र मोदी यांच्या अध्यक्षतेखाली झालेल्या कॅबिनेटच्या बैठकीत 6 रब्बी पिकांचे नवीन दर मंजूर करण्यात आले आहेत. माहिती आणि प्रसारण मंत्री अश्विनी वैष्णव यांनी याची माहिती दिली.यंदा गव्हाच्या दरात फक्त 25 रुपयांची वाढ करण्यात आली आहे. गेल्या वर्षी गव्हाला 2585 रुपये MSP होता तो आता 2610 रुपये प्रति क्विंटल झाला आहे. सरकारने सांगितले की गव्हाचा उत्पादन खर्च 1264 रुपये आहे आणि त्यावर 106 टक्के नफा देऊन हा दर ठरवला आहे. सर्वात जास्त वाढ करडईला मिळाली आहे. करडईच्या दरात 675 रुपयांची वाढ झाली आहे.
नवीन MSP दरपत्रक 2027-28 असे आहे
यंदा एकूण 324 लाख टन खरेदीवर सरकारला 90,962 कोटी रुपये शेतकऱ्यांना द्यावे लागणार आहेत.
तज्ज्ञांच्या मते गव्हावर आधीच 106 टक्के नफा मिळत आहे त्यामुळे सरकारने जास्त वाढ दिली नाही. दुसरे कारण म्हणजे महागाई. सरकार मोफत रेशनसाठी गहू खरेदी करते. जर MSP जास्त वाढवला तर सरकारी तिजोरीवर भार पडेल आणि पीठ महाग होईल.
देशात अजूनही 60 लाख टन डाळी आयात कराव्या लागतात. तसेच खाद्यतेलासाठी देखील आयात करावी लागते. त्यामुळे शेतकऱ्यांनी जास्तीत जास्त मोहरी आणि हरभरा लावावा यासाठी सरकारने त्यांचे भाव जास्त वाढवले आहेत. कृषी मंत्री शिवराज सिंह चौहान यांनी सांगितले की भात कापणीनंतर रिकाम्या राहणाऱ्या शेतात डाळी लावण्यासाठी सरकार मदत करणार आहे.
महाराष्ट्र आणि कर्नाटक सारख्या दुष्काळी भागात कमी पाण्यात येणारी पिके लावण्याचा सल्ला सरकारने दिला आहे. यंदा मान्सून 13 टक्के कमी झाला आहे त्यामुळे हरभरा आणि करडई सारखी पिके फायद्याची ठरू शकतात.