पुणे : दिवाळी सणासाठी गावी जाणाऱ्यांची गर्दी वाढल्याने पुणे-अहिल्यानगर महामार्गावर सलग तिसऱ्या दिवशीही वाहतूक कोंडीची समस्या कायम आहे. शनिवारी सकाळपासूनच वाघोली, सणसवाडी, शिक्रापूर, रांजणगाव आणि शिरूर परिसरात तब्बल 10 ते 12 किलोमीटरपर्यंत वाहनांच्या लांबच लांब रांगा लागल्या आहेत. त्यामुळे प्रवाशांना तासन् तास महामार्गावरच अडकून पडावे लागत आहे.
दिवाळीच्या सुट्ट्या सुरू झाल्यापासून पुण्यातून मराठवाडा, विदर्भ आणि उत्तर महाराष्ट्राकडे जाणाऱ्या वाहनांची संख्या प्रचंड वाढली आहे. पुणे-अहिल्यानगर महामार्ग हा या भागाकडे जाणारा मुख्य मार्ग असल्याने यावर सर्वाधिक ताण आला आहे. खासगी कार, एसटी बस, ट्रॅव्हल्स आणि मालवाहू वाहनांची एकाच वेळी गर्दी झाल्याने वाहतुकीचा पूर्ण बोजवारा उडाला आहे.
वाघोली चौकातूनच वाहनांची रांग सुरू होत आहे. सणसवाडी, शिक्रापूर फाटा, रांजणगाव एमआयडीसी आणि शिरूरपर्यंत ही कोंडी पसरली आहे. काही ठिकाणी अर्धा तासाचा प्रवास करण्यासाठी दोन ते तीन तास लागत आहेत. अनेक ठिकाणी वाहने जागेवरच उभी आहेत.
उन्हात, भुकेल्या पोटी लहान मुले, महिला, वयोवृद्ध प्रवासी वाहनात अडकले आहेत. पाणी संपले, हॉटेलपर्यंत पोहोचता येत नाही, अशी तक्रार प्रवाशांनी केली आहे. अनेकांनी गावी पोहोचायला उशीर होणार असल्याने नातेवाईकांना फोन करून कळवले आहे. काही प्रवाशांनी सोशल मीडियावर व्हिडिओ टाकून प्रशासनाकडे मदत मागितली आहे.
वाहतूक सुरळीत करण्यासाठी पुणे ग्रामीण वाहतूक पोलिसांचे पथक ठिकठिकाणी तैनात करण्यात आले आहे. वाघोली, शिक्रापूर आणि शिरूर येथे जादा मनुष्यबळ लावण्यात आले आहे. जड वाहनांना काही काळ थांबवून हलकी वाहने आधी सोडण्याचा प्रयत्न सुरू आहे. मात्र वाहनांची संख्या जास्त असल्याने कोंडी फुटायला वेळ लागत आहे.
पुढील दोन दिवसही ही गर्दी कायम राहण्याची शक्यता आहे. त्यामुळे शक्य असल्यास पहाटे लवकर किंवा रात्री उशिरा प्रवास करा. निघण्याआधी पाणी, नाश्ता, औषधे सोबत घ्या. पर्यायी मार्ग म्हणून पुणे-सोलापूर मार्गे किंवा पुणे-नाशिक मार्गाचा विचार करा. लहान मुलांसह प्रवास करत असाल तर जादा वेळ लागेल, हे लक्षात ठेवूनच निघा.
दिवाळीच्या आनंदासाठी गावी निघालेल्या प्रवाशांचा प्रवास सध्या तरी कोंडीतच अडकला आहे.