दिवाळी आपल्यासाठी आनंदाचा सण असला तरी आपल्या घरातील कुत्रा किंवा मांजरीसाठी हा सगळ्यात जास्त घाबरवणारा काळ असतो. फटाक्याचा मोठा आवाज त्यांच्या कानाला आपल्यापेक्षा 4 पट जास्त मोठा ऐकू येतो. त्यामुळे अनेक कुत्री घाबरून पळतात, जेवण बंद करतात, थरथर कापतात किंवा सोफ्याखाली लपून बसतात. दरवर्षी दिवाळीत शेकडो पाळीव प्राणी हरवतात. जर तुमच्या घरातही पाळीव प्राणी असेल तर या दिवाळीत ही काळजी नक्की घ्या.
1. त्याला एक सुरक्षित जागा बनवून द्या
फटाके वाजायला लागले की त्याला जबरदस्ती बाहेर घेऊन जाऊ नका. घरातील एका शांत खोलीत त्याचे बेड किंवा ब्लँकेट ठेवा. त्या खोलीचे दरवाजे खिडक्या बंद करा जेणेकरून आवाज कमी येईल. अनेक कुत्र्यांना बाथरूम किंवा कपाटाच्या आड लपायला आवडते, त्याला तिथेच राहू द्या.
2. मोठ्या आवाजात टीव्ही किंवा गाणी लावा
फटाक्यांचा आवाज कमी करण्यासाठी घरात टीव्ही किंवा हलके संगीत सुरु ठेवा. यामुळे बाहेरचा आवाज थोडा कमी जाणवेल. पण खूप मोठ्या आवाजात लावू नका, त्यामुळे तो अजून घाबरेल. शांत आणि त्याला आवडणारे संगीत लावा.
3. त्याला एकटे सोडू नका
दिवाळीच्या रात्री कुत्र्याला एकटे घरात सोडून फटाके फोडायला जाऊ नका. तो घाबरलेला असताना मालक जवळ असेल तर त्याला सुरक्षित वाटते. त्याच्या जवळ बसा, त्याला हळू हळू थोपटत राहा. ओरडू नका किंवा त्याला फटाके दाखवून घाबरवू नका.
4. कानासाठी आणि जेवणासाठी उपाय
आजकाल पेट शॉपमध्ये कुत्र्यांसाठी इअर मफ्स मिळतात. ते कानावर लावल्यास आवाज खूप कमी येतो. जर ते नसेल तर कापसाचा बोळा हलकासा लावू शकता पण खोलवर लावू नका. संध्याकाळी फटाके सुरु होण्यापूर्वीच त्याला जेवण द्या. घाबरलेला कुत्रा नंतर जेवत नाही. जेवणात त्याला आवडणारे बिस्कीट किंवा चिकन द्या म्हणजे त्याचे लक्ष दुसरीकडे जाईल.
5. डॉक्टरांचा सल्ला आधीच घ्या
जर तुमचा कुत्रा खूप जास्त घाबरत असेल, थरथर कापत असेल किंवा सतत भुंकत असेल तर दिवाळीच्या 2 दिवस आधीच डॉक्टरांना भेटा. डॉक्टर काही शांत करणारे औषध किंवा सिरप देतात. स्वतःच्या मनाने कोणतेही झोपेचे औषध देऊ नका, त्यामुळे त्याच्या जीवाला धोका होऊ शकतो.
सगळ्यात महत्त्वाचे - तुम्ही फटाके फोडत असाल तर पाळीव प्राण्यांपासून लांब फोडा. लहान मुलांनी कुत्र्याच्या अंगावर फटाके टाकल्याच्या घटना दरवर्षी घडतात. असे करू नका. ही मुकी जनावरे बोलू शकत नाहीत पण त्यांनाही भीती वाटते. या दिवाळीत थोडी काळजी घ्या आणि तुमच्या पाळीव मित्राची दिवाळीही आनंदी करा.