अकोला - अकोला शहरात एक थरारक घटना समोर आली आहे. शहरातील सुधीर कॉलनी परिसरात राहणाऱ्या कांडेकर कुटुंबाच्या घरातील स्वच्छतागृहाच्या कमोडमध्ये चक्क विषारी काळा नाग आढळल्याने एकच खळबळ उडाली आहे. कमोडच्या गोलाकार भागात हा नाग विळखा घालून बसला होता. सुदैवाने घरातील सदस्यांचे वेळीच लक्ष गेल्याने मोठा अनर्थ टळला.
मिळालेल्या माहितीनुसार सकाळच्या वेळी घरातील सदस्य स्वच्छतागृहात गेले असता त्यांना कमोडमध्ये काहीतरी काळे हालत असल्याचे दिसले. जवळ जाऊन पाहिले असता तो विषारी काळा नाग असल्याचे लक्षात आले. यानंतर कुटुंबाने आरडाओरड न करता थेट सर्पमित्रांना बोलावले.
सर्पमित्र बाळ काळणे यांनी घटनास्थळी पोहोचून या नागाला सुखरूप बाहेर काढले आणि नैसर्गिक अधिवासात सोडले. या घटनेमुळे संपूर्ण सुधीर कॉलनी परिसरात भीतीचे वातावरण निर्माण झाले आहे.
का घुसत आहेत साप घरात
यावर्षी राज्यात भीषण दुष्काळाची परिस्थिती आहे. याचा फटका आता वन्यजीवांना देखील बसत आहे. जंगलात आणि शेतात पाणी आटल्याने आणि प्रचंड उष्णतेमुळे थंडाव्याच्या शोधात साप नागरी वस्तीकडे येत आहेत. सर्पमित्र बाळ काळणे यांनी सांगितले की, नैसर्गिक अधिवासात पाणी आणि थंडावा मिळत नसल्याने नाग, घोणस, अजगर यांसारखे सरपटणारे प्राणी मानवी वस्तीत शिरत आहेत.
विशेषतः घराच्या ड्रेनेज पाइपलाइनमधून साप थेट कमोडपर्यंत येऊ शकतात. पाइपलाइन थंड असल्याने साप तिथे आश्रय घेतात.
नागरिकांनी काय काळजी घ्यावी
1. घराच्या ड्रेनेज पाइपलाइनला बारीक लोखंडी जाळी बसवून घ्या.
2. स्वच्छतागृहाचे दार नेहमी बंद ठेवा आणि कमोडचे झाकण लावून ठेवा.
3. रात्रीच्या वेळी स्वच्छतागृहात जाण्यापूर्वी लाईट लावून नक्की तपासा.
4. घराच्या आजूबाजूला कचरा, उंदीर किंवा पक्ष्यांची घरटी होऊ देऊ नका.
5. साप दिसल्यास स्वतः मारण्याचा किंवा पकडण्याचा प्रयत्न करू नका, तात्काळ सर्पमित्र किंवा वनविभागाशी संपर्क साधा.
या घटनेनंतर अकोल्यातील नागरिकांमध्ये भीती असली तरी वनविभागाने नागरिकांना घाबरून न जाता सतर्क राहण्याचे आवाहन केले आहे.