मुंबई : जुहू परिसरात रविवारी रात्री बॉलिवूड अभिनेता टायगर श्रॉफवर झालेल्या गोळीबाराच्या घटनेमुळे मोठी खळबळ उडाली आहे. या हल्ल्यामध्ये अभिनेता टायगर श्रॉफसह अन्य एक व्यक्ती गंभीर जखमी झाली असून, त्यांना तातडीने उपचारासाठी नजीकच्या रुग्णालयात दाखल करण्यात आले आहे. या धक्कादायक घटनेनंतर मुंबई पोलीस तातडीने सतर्क झाले असून, हल्लेखोरांचा शोध घेण्यासाठी विविध पथके रवाना करण्यात आली आहेत.
मिळालेल्या माहितीनुसार, या हल्ल्याची जबाबदारी लॉरेन्स बिश्नोई गँगने स्वीकारल्याची एक ऑडिओ क्लिप सध्या सोशल मीडियावर वेगाने व्हायरल होत आहे. या व्हायरल झालेल्या ऑडिओ क्लिपमध्ये गँगस्टर अनिल पंडित याचा आवाज असल्याचा दावा केला जात असून, त्याने या हल्ल्यामागे बिश्नोई गँगचा हात असल्याचे म्हटले आहे. मात्र, 'टॉप न्यूज मराठी' या व्हायरल ऑडिओ क्लिपच्या सत्यतेची किंवा त्यातील दाव्यांची कोणतीही पुष्टी करत नाही.
घटनेचे गांभीर्य लक्षात घेता जुहू परिसरात पोलिसांचा मोठा फौजफाटा तैनात करण्यात आला आहे. घटनास्थळावरील आणि परिसरातील सीसीटीव्ही फुटेजच्या आधारे पोलीस हल्लेखोरांचा कसून शोध घेत आहेत. या हाय-प्रोफाइल प्रकरणामुळे बॉलिवूड वर्तुळात आणि नागरिकांमध्ये सुरक्षेचा प्रश्न पुन्हा एकदा ऐरणीवर आला आहे.