व्यक्तिविशेष : नीरू धांडा यांचा जन्म 25 मे 2000 रोजी हरियाणातील जींद जिल्ह्यातील संगतपुरा या छोट्याशा गावात झाला. त्यांच्या वडिलांचे नाव सुरेश धांडा असून ते दोन एकर जमीन असलेले शेतकरी आहेत आणि आईचे नाव सुदेश धांडा आहे. घरात तीन भावंडे असून नीरू दुसऱ्या क्रमांकावर आहे. घरची परिस्थिती अगदी साधी होती, शेती आणि काही जनावरे यावरच कुटुंबाचा उदरनिर्वाह चालायचा. सुरुवातीला नीरूला शूटिंगशी काहीच संबंध नव्हता, ती शाळेत कबड्डी खेळायची आणि राज्यस्तरापर्यंत कबड्डी खेळली आहे.
प्राथमिक शिक्षण जींदमधील सरकारी शाळेत झाले. नंतर कुटुंब मध्य प्रदेशातील शिवपुरी येथे स्थलांतरित झाले. तिथेच तिने बारावीपर्यंतचे शिक्षण पूर्ण केले. शूटिंगमुळे तिचे कॉलेजचे शिक्षण खंडित झाले पण तिने मध्य प्रदेश स्टेट शूटिंग अकादमीमध्ये प्रवेश घेतल्यावर तिथेच तांत्रिक शिक्षण आणि क्रीडा प्रशिक्षण घेतले. पुढे भारतीय लष्करात भरती झाल्यामुळे आर्मी मार्कसमनशिप युनिट महू, इंदूर येथे तिने प्रोफेशनल ट्रेनिंग घेतले.
ही गोष्ट 2018 सालची आहे. नीरूचे मामेभाऊ लक्ष्य शेरॉन यांनी जकार्ता आशियाई क्रीडा स्पर्धेत पुरुषांच्या ट्रॅप प्रकारात रौप्य पदक जिंकले. टीव्हीवर त्यांचा सत्कार पाहून नीरूने आईला सांगितले की मलाही शूटिंग करायचे आहे. पण एक बंदूक घ्यायला 4 ते 5 लाख रुपये लागतात, हे तिच्या शेतकरी कुटुंबाला परवडणारे नव्हते.
मग तिच्या मामांनी, माजी राष्ट्रीय कुस्तीपटू सोमवीर शेरॉन यांनी तिला मदत केली. नीरू फरीदाबादला त्यांच्या घरी राहून करणी सिंग शूटिंग रेंज दिल्ली येथे लक्ष्यच्या बंदुकीने सराव करू लागली. सुरुवातीला वडिलांनी तिला टिनाच्या डब्यावर नेम धरायला लावला होता. खांद्यावर आणि हनुवटीवर रिकोईलमुळे जखमा झाल्या तरी ती मागे हटली नाही. 2019 मध्ये तिने मध्य प्रदेश स्टेट शूटिंग अकादमीची चाचणी पास केली आणि तिथे तिला मोफत बंदूक आणि काडतुसे मिळू लागली, तिथून तिचा खरा प्रवास सुरू झाला.
नीरू धांडाची गोष्ट फक्त एका पदकाची नाही तर एका शेतकऱ्याच्या मुलीने कर्ज काढून बंदूक न घेता उधारीच्या बंदुकीवर सराव करून जग जिंकण्याची गोष्ट आहे. तिच्या आईने काल एका मुलाखतीत सांगितले, " छोरी ने बता दिया सपनो को कैसे पुरा करना है...!"
माहिती स्रोत - इंटरनेट