पुणे : विकेंडला लोणावळा, खंडाळ्यात प्रचंड गर्दी असते. शांतता आणि निसर्गाच्या सानिध्यात वेळ घालवायचा असेल तर पुण्याजवळील कुसगाव-पवना डॅम बॅकवॉटर हे नवीन डेस्टिनेशन पर्यटकांसाठी बेस्ट ऑप्शन ठरत आहे. लोणावळ्यापासून अवघ्या 15 किलोमीटरवर असलेले हे ठिकाण आता ग्लॅम्पिंगमुळे चर्चेत आले आहे.
पवना धरणाच्या बॅकवॉटरवर लेक साईड कॅम्पिंग, टेंट स्टे आणि आता आलिशान ग्लॅम्पिंगची सुविधा सुरू करण्यात आली आहे. येथे तुम्हाला थेट पाण्याच्या काठावर टेंट, कॉटेज आणि डोम स्टे मिळतो. संध्याकाळी बॅकवॉटरच्या काठावर बार्बेक्यू, बोनफायर आणि रात्री तंबूतून दिसणारे तारांगण हे या ठिकाणाचे मुख्य आकर्षण आहे.
येथील कॅम्पिंगची सुरुवात संध्याकाळी 4 वाजता होते. चेक-इन नंतर हाय-टी, संध्याकाळी बोटिंग, कायाकिंग आणि पवना लेकवर सनसेट पॉईंटचा आनंद घेता येतो. रात्री व्हेज-नॉनव्हेज बार्बेक्यू, बोनफायरसह डीजे आणि दुसऱ्या दिवशी सकाळी ट्रेकिंग आणि नाश्त्याची सुविधा दिली जाते. काही ठिकाणी AC ग्लॅम्पिंग टेंट देखील उपलब्ध आहेत.
पुण्यापासून कुसगाव हे अंतर सुमारे 55 किलोमीटर आहे. पुणे-दादर हायवेवरून कामशेत मार्गे पवना धरणाकडे जाता येते. स्वतःच्या गाडीने दीड ते दोन तासात पोहोचता येते. पावसाळ्यानंतर ऑक्टोबर ते फेब्रुवारी हा येथे जाण्यासाठी बेस्ट सीझन मानला जातो.
साधारण टेंटसाठी प्रति व्यक्ती 1200 ते 1500 रुपये आणि ग्लॅम्पिंग कॉटेजसाठी 2500 ते 3500 रुपये प्रति व्यक्ती असा खर्च येतो. यामध्ये संध्याकाळचा चहा, रात्रीचे जेवण, बार्बेक्यू आणि सकाळचा नाश्ता समाविष्ट असतो. विकेंडला अगोदर बुकिंग करणे आवश्यक आहे. गर्दीपासून दूर आणि निसर्गाच्या जवळ शांतता शोधणाऱ्यांसाठी पवना बॅकवॉटर कॅम्पिंग हा एक नवा आणि परवडणारा पर्याय ठरत आहे.