पुणे : आज श्रावण महिन्यातील तिसरा श्रावणी सोमवार आहे. यंदा 13 ऑगस्टपासून महाराष्ट्रात श्रावण सुरू झाला असून यंदा एकूण चार श्रावणी सोमवार आले आहेत. आजचा सोमवार आणखी खास आहे कारण आजच्याच दिवशी हेरंब संकष्टी चतुर्थीचा दुर्मिळ योग जुळून आला आहे.
श्रावणात नवविवाहित महिला पहिली पाच वर्षे शिवामूठ व्रत करतात. यंदा क्रम असा आहे - पहिला सोमवार 17 ऑगस्टला तांदळाची मूठ, दुसरा 24 ऑगस्टला तिळाची मूठ, आज तिसरा सोमवार 31 ऑगस्टला मुगाची शिवामूठ आणि चौथा सोमवार 7 सप्टेंबरला जवसाची शिवामूठ वाहायची आहे. मुगाची शिवामूठ वाहताना "शिवा शिवा महादेवा, माझी शिवामूठ ईश्वरा देवा, मनातल्या इच्छा पूर्ण कर रे देवा" असा तीन वेळा मंत्र म्हणावा.
सकाळी स्नान करून उपवास करावा. शिव मंदिरात जाऊन किंवा घरातील शिवलिंगाला गंगाजल, दुध आणि पंचामृताने अभिषेक करावा. यानंतर चंदन, बेलपत्र, पांढरी फुले, अक्षता अर्पण करावी. बेलपत्र वाहताना देठ आपल्याकडे ठेवावा. त्यानंतर मुगाची शिवामूठ वाहून आरती करावी आणि दिवसभरात एकदाच एकभुक्त राहावे.
स्कंद पुराणानुसार श्रावण महिना हा भगवान शंकराचा सर्वात प्रिय महिना आहे. समुद्र मंथनातून निघालेले विष शंकराने प्राशन केले, त्याची उष्णता शांत करण्यासाठी श्रावणात जलाभिषेक केला जातो. शिवामूठ व्रत केल्याने वैवाहिक जीवन सुखी होते, पतीला दीर्घायुष्य लाभते आणि मनोकामना पूर्ण होतात अशी मान्यता आहे. आज संकष्टी असल्याने सकाळी शिवपूजा आणि रात्री चंद्रदर्शनानंतर गणपतीची पूजा करून उपवास सोडावा.