आंतरराष्ट्रीय युवा दिनानिमित्त प्रसिद्ध रिअल इस्टेट पोर्टल 'मॅजिकब्रिक्स' ने आपला ताजा 'हाउसिंग सेंटीमेंट इंडेक्स' (HSI)अहवाल जाहीर केला आहे. या अहवालातून भारतीय गृहनिर्माण क्षेत्रात एक अत्यंत सकारात्मक आणि वेगाने बदलणारा नवा ट्रेंड समोर आला आहे. आजच्या तरुण भारतीयांमध्ये, विशेषतः 'जेन झी' पिढीमध्ये स्वतःचे हक्काचे घर घेण्याची तीव्र आकांक्षा असल्याचे या अहवालातून प्रकर्षाने अधोरेखित झाले आहे. सर्व वयोगटांच्या तुलनेत तरुणांनी रिअल इस्टेट बाजाराबाबत सर्वाधिक सकारात्मक आणि उत्साही भावना नोंदवल्या आहेत.
मॅजिकब्रिक्सच्या या ताज्या सर्वेक्षणानुसार, वयाच्या ३० वर्षांपर्यंतच्या 'जेन झी' (Gen Z) खरेदीदारांनी १२८ इतका उच्च HSI नोंदवला आहे. हा आकडा इतर सर्व ज्येष्ठ वयोगटांपेक्षा खूप जास्त आहे. याउलट, जसजसे वय वाढत जाते, तसतशी घरखरेदीविषयीची सकारात्मक भावना किंवा उत्साह हळूहळू कमी होत जातो, असे निष्कर्षांवरून दिसते. या अहवालानुसार विविध पिढ्यांचा निर्देशांक खालीलप्रमाणे असून, यामध्ये ३० वर्षांपर्यंतच्या जेन झी तरुणांचा निर्देशांक सर्वाधिक म्हणजेच १२८ HSI आहे, तर त्याखालोखाल मिलेनिअल्सचा ११९ HSI आणि जेन एक्स वयोगटाचा ११० ते १०९ HSI इतका सर्वात कमी उत्साह नोंदवला गेला आहे.
पारंपरिकपणे असे मानले जायचे की, वयाच्या चाळीशी किंवा पन्नाशीनंतर लोक घरखरेदीचा विचार करतात. मात्र, आता हा विचार पूर्णपणे बदलला आहे. आजचे तरुण केवळ भाड्याच्या घरात राहून पैसे खर्च करण्याऐवजी, करिअरच्या सुरुवातीच्या काळातच स्वतःच्या मालकीचे घर घेण्याला प्राधान्य देत आहेत.
आजच्या तरुण पिढीमध्ये घरखरेदीचा कल वाढण्यामागे प्रामुख्याने आयटी, कॉर्पोरेट आणि स्टार्टअप संस्कृतीमुळे वयाच्या विशी-पंचविशीतच मिळणारे चांगले पॅकेज आणि त्यामुळे आलेले लवकर आर्थिक स्थैर्य हे मुख्य कारण आहे; तसेच कोरोना महामारीच्या अनुभवानंतर तरुणांना स्वतःच्या हक्काच्या घराचे आणि आर्थिक सुरक्षिततेचे महत्त्व अधिक चांगल्या प्रकारे पटले असून, बँकांकडून मिळणारे सुलभ गृहकर्ज आणि दीर्घ मुदतीचे हप्ते (EMIs) यांमुळे वयाच्या ३० वर्षांच्या आतच हक्काचे घर घेण्याचे त्यांचे स्वप्न सहज शक्य झाले आहे.
तरुणांमधील हा वाढता आत्मविश्वास भारतीय रिअल इस्टेट क्षेत्रासाठी अत्यंत फायदेशीर ठरणार आहे. बांधकाम व्यावसायिकांकडूनही आता याच तरुण पिढीला आकर्षित करण्यासाठी आधुनिक सोयी-सुविधांनी सज्ज, परवडणारी आणि 'स्मार्ट होम' फीचर्स असलेली घरे विकसित करण्यावर भर दिला जात आहे. आगामी काळात ही तरुण पिढीच गृहनिर्माण क्षेत्राच्या वाढीचे मुख्य इंजिन ठरेल, असा विश्वास तज्ज्ञांनी व्यक्त केला आहे.