मुंबई: राज्यात सध्या अन्न आणि औषध प्रशासन विभागाच्या धडक कारवाया चर्चेचा विषय बनल्या आहेत. भेसळयुक्त पदार्थ, बेकायदेशीर औषधे आणि निकृष्ट दर्जाच्या खाद्यपदार्थांविरोधात एफडीएने हाती घेतलेली मोहीम जोरात सुरू आहे. या कारवायांचे नेतृत्व करणारे आयएएस अधिकारी तुकाराम मुंढे यांच्या आक्रमक आणि जनहिताच्या भूमिकेमुळे ते पुन्हा एकदा राज्यभरात चर्चेत आले आहेत. मुंढे यांच्या काम करण्याच्या थेट आणि न घाबरणाऱ्या शैलीमुळे सर्वसामान्य नागरिकांमध्ये त्यांच्याबद्दल मोठा विश्वास निर्माण झाला आहे. अनेकदा त्यांच्या कारवाईचे व्हिडिओ आणि बातम्या व्हायरल झाल्याने लोक त्यांना 'सिंघम अधिकारी' म्हणूनही हाक मारू लागले आहेत.
मुख्यमंत्र्यांनी काय म्हटले ?
या पार्श्वभूमीवर मुख्यमंत्री देवेंद्र फडणवीस यांनी माध्यमांशी बोलताना एफडीएच्या कामगिरीवर समाधान व्यक्त केले. त्यांना एफडीएच्या सध्याच्या कारवाईबद्दल विचारले असता मुख्यमंत्री म्हणाले की, राज्यात अन्न आणि औषध प्रशासनाकडून अत्यंत चांगल्या पद्धतीने काम सुरू आहे. खाद्यपदार्थांमध्ये भेसळ करणे, मानके न पाळणे हा थेट जनतेच्या जीवाशी खेळ आहे. अशा गोष्टींना कोणत्याही परिस्थितीत माफी नाही.
ते पुढे म्हणाले की, लोकांच्या आरोग्याचा प्रश्न आला की त्यावर कठोर पावले उचलावीच लागतात. गेल्या काही दिवसांपासून एफडीएने जे धाडसी निर्णय घेतले आहेत आणि जी कारवाई केली आहे त्यामुळे नागरिकांच्या मनात प्रशासनाबद्दल विश्वास वाढला आहे. ही कारवाई अशीच सातत्याने सुरू राहील. एफडीएची ही भूमिका निश्चितच स्वागतार्ह आहे आणि यामुळे मला आनंद झाला आहे.
तुकाराम मुंढे पुन्हा चर्चेत
तुकाराम मुंढे हे राज्यातील मोजक्या अशा अधिकाऱ्यांपैकी आहेत ज्यांनी आपल्या पारदर्शक आणि कडक कारभारामुळे वेगळी ओळख निर्माण केली आहे. ते जिथे जिथे अधिकारी म्हणून गेले तिथे त्यांनी नियमबाह्य काम करणाऱ्यांवर थेट कारवाईचा बडगा उगारला आहे. त्यामुळेच सामान्य माणूस त्यांच्याकडे आशेने पाहतो. सध्या एफडीएच्या माध्यमातून ते राज्यभरात अवैध कारखाने, भेसळ करणारे व्यावसायिक आणि आरोग्यास घातक उत्पादनांची विक्री करणाऱ्यांवर धडक कारवाई करत आहेत. त्यांच्या या कामामुळे बाजारात खळबळ उडाली आहे.
राज्याच्या अर्थव्यवस्थेवरही भाष्य
यावेळी मुख्यमंत्री फडणवीस यांनी राज्याच्या अर्थव्यवस्थेचा देखील उल्लेख केला. ते म्हणाले की, आज आपल्या देशाची अर्थव्यवस्था जगात चौथ्या क्रमांकावर पोहोचली आहे. आणि या मोठ्या अर्थव्यवस्थेमध्ये महाराष्ट्राचा वाटा सर्वात मोठा आहे. त्यामुळे राज्यातील नागरिकांच्या आरोग्यासाठी आणि सुरक्षिततेसाठी अशा प्रकारच्या चांगल्या कारभाराची गरज आहे. मुख्यमंत्र्यांनी एफडीएच्या कारवाईचे आणि विशेषतः तुकाराम मुंढे यांच्या कार्यपद्धतीचे केलेले कौतुक सोशल मीडियावर चांगलेच व्हायरल होत आहे. नागरिकांकडूनही या कारवाईला मोठा पाठिंबा मिळत असल्याचे दिसून येत आहे.