नांदेड: पंजाबमधील शिरोमणी अकाली दलाचे अध्यक्ष आणि राज्याचे माजी उपमुख्यमंत्री सुखबीर सिंह बादल यांच्यावर बुधवारी नांदेडमध्ये हल्ला झाला. हा हल्ला तख्त श्री हजूर साहिब गुरुद्वाराच्या परिसरात झाला. या घटनेत बादल यांच्या उजव्या हाताला जखम झाली असून त्यांच्यावर तातडीने उपचार करण्यात आले.
सुखबीर सिंह बादल त्यांच्या पत्नी आणि खासदार हरसिमरत कौर बादल यांच्यासोबत धार्मिक दर्शनासाठी नांदेडला आले होते. दर्शन झाल्यानंतर ते गुरुद्वाराच्या बाहेर पडत असताना एका व्यक्तीने अचानक त्यांच्यावर हल्ला केला. या घटनेचा एक व्हिडिओ सोशल मीडियावर व्हायरल झाला आहे. व्हिडिओमध्ये सुरक्षा कर्मचारी बादल यांना तातडीने इमारतीच्या आत घेऊन जाताना दिसत आहेत. त्याचवेळी बादल यांच्या उजव्या हाताला पट्टी बांधलेली दिसून येत आहे. घटना घडताच नांदेड पोलिसांनी घटनास्थळी धाव घेतली आणि आरोपीला ताब्यात घेतले. हल्ल्याचे नेमके कारण अद्याप स्पष्ट झालेले नाही. पोलीस आरोपीची चौकशी करत असून त्यामागील उद्देश शोधण्याचा प्रयत्न सुरू आहे.
या प्रकरणाची माहिती मिळताच महाराष्ट्राचे मुख्यमंत्री देवेंद्र फडणवीस यांनी नांदेडच्या पोलीस अधीक्षकांशी चर्चा केली. त्यांनी संपूर्ण घटनेची माहिती जाणून घेतली आणि दोषींवर कठोर कारवाई करण्याचे निर्देश दिले. मुख्यमंत्र्यांनी स्वतः सुखबीर सिंह बादल यांच्याशी फोनवरून संपर्क साधून त्यांच्या प्रकृतीची चौकशी केली. अधिकाऱ्यांनी दिलेल्या माहितीनुसार बादल यांची प्रकृती स्थिर आहे आणि त्यांना कोणताही गंभीर धोका नाही.
या घटनेवर प्रतिक्रिया देताना राज्याचे गृहराज्यमंत्री डॉ. पंकज भोयर म्हणाले की, "ही घटना दुर्दैवी आहे. मी सध्या भंडारा येथील पक्षाच्या बैठकीत आहे. संपूर्ण माहिती घेतल्यानंतर संबंधितांवर कडक कारवाई केली जाईल. महाराष्ट्रात अशा प्रकारच्या घटनांना जागा नाही." सुखबीर सिंह बादल हे पंजाबमधील मोठे राजकीय नेते आहेत. ते दीर्घकाळ पंजाबचे उपमुख्यमंत्री होते आणि सध्या अकाली दलाचे प्रमुख आहेत. हजूर साहिब हे शीख धर्मातील पाच तख्तांपैकी एक आहे. त्यामुळे मोठ्या संख्येने भाविक येथे दर्शनासाठी येतात. अशा पवित्र ठिकाणी झालेल्या या हल्ल्यामुळे स्थानिक प्रशासनाने गुरुद्वारा परिसरातील सुरक्षा वाढवली आहे.
पोलिसांनी घटनास्थळावरील सीसीटीव्ही फुटेज तपासण्यास सुरुवात केली आहे. आरोपी एकटा होता की यामागे आणखी कोणी आहे याचा तपास केला जात आहे. अकाली दलाच्या कार्यकर्त्यांनी या हल्ल्याचा निषेध केला असून दोषींना कठोर शिक्षा देण्याची मागणी केली आहे.
सध्या नांदेडमध्ये परिस्थिती नियंत्रणात आहे. बादल यांना प्राथमिक उपचारानंतर रुग्णालयातून डिस्चार्ज देण्यात आला आहे.