मुंबई : मुंबईच्या महापौर रितू तावडे यांना आज एक धमकीचा ई-मेल आल्याने राजकीय आणि प्रशासकीय वर्तुळात खळबळ उडाली आहे. या मेलमध्ये मुंबई महानगरपालिकेच्या मुख्यालयात आणि महापौरांच्या कार्यालयात बॉम्बस्फोट घडवून आणण्याची धमकी देण्यात आली आहे. धमकीचा मेल मिळताच तातडीने मुंबई पोलिसांच्या वरिष्ठ अधिकाऱ्यांना याबाबत माहिती देण्यात आली असून तपासाला सुरुवात झाली आहे.
पोलिसांनी दिलेल्या प्राथमिक माहितीनुसार, अज्ञात व्यक्तीने पाठवलेल्या या ई-मेलमध्ये महापौर रितू तावडे यांना थेट जीवे मारण्याची धमकी दिली आहे. तसेच मुंबई महानगरपालिकेच्या इमारतीला लक्ष्य करून बॉम्बस्फोट करण्याचा इशारा देण्यात आला आहे. मेलमध्ये विशिष्ट तारीख किंवा वेळेचा उल्लेख नसला तरीही धमकीचे गांभीर्य लक्षात घेऊन सुरक्षा यंत्रणा सतर्क करण्यात आल्या आहेत. सायबर सेलच्या मदतीने हा मेल कोणी आणि कुठून पाठवला याचा शोध घेण्याचे काम सुरू आहे.
धमकीचा मेल मिळाल्यानंतर लगेचच मुंबई पोलिसांनी महापौर कार्यालय आणि BMC मुख्यालयाच्या सुरक्षेत वाढ केली आहे. बॉम्ब शोधक पथक आणि डॉग स्क्वॉडने परिसराची कसून तपासणी केली. महापौर रितू तावडे यांच्या निवासस्थानी आणि त्यांच्या दैनंदिन दौऱ्यांमध्येही सुरक्षा कडक करण्यात आली आहे. पोलिसांकडून सध्या या धमकीकडे गांभीर्याने पाहिले जात असून कोणताही धोका पत्करला जाणार नाही, असे वरिष्ठ अधिकाऱ्यांनी सांगितले.
या प्रकरणामुळे मुंबईतील सुरक्षा यंत्रणा एकदा पुन्हा अलर्ट मोडवर आल्या आहेत. तपासात पुढे काय निष्पन्न होते याकडे सर्वांचे लक्ष लागले आहे.