मुंबई : पश्चिम महाराष्ट्राच्या जीवनदायिनी असलेल्या कोयना धरणाला आता "छत्रपती शिवाजी महाराज कोयना जलसागर" या नावाने ओळखले जाणार आहे. शासनाने यासंदर्भात महत्त्वपूर्ण आणि ऐतिहासिक निर्णय घेतला आहे. याबतची माहिती जलसंपदा मंत्री राधाकृष्ण विखे पाटील यांनी दिली. राधाकृष्ण विखे पाटील हे गोदावरी आणि कृष्णा खोरे विकास महामंडळाचे मंत्री देखील आहेत. त्यांनी या निर्णयाबद्दल मुख्यमंत्री देवेंद्र फडणवीस यांचे विशेष आभार मानले आहेत.
जलसंपदा मंत्री राधाकृष्ण विखे पाटील यांनीच मुख्यमंत्री देवेंद्र फडणवीस यांच्याकडे कोयना जलसागराचे नामांतर करण्याची विनंती केली होती. कोयनेचा इतिहास आणि शिवरायांच्या नावाशी असलेला संबंध लक्षात घेऊन हे नाव देण्याचा प्रस्ताव त्यांनी मांडला होता. या प्रस्तावाचा सकारात्मक विचार करून मुख्यमंत्री देवेंद्र फडणवीस यांनी त्याला मंजुरी दिली. त्यानंतर शासनाने याबाबतचा अधिकृत शासन निर्णय जारी केला आहे. यापुढे शासनाचे सर्व पत्रव्यवहार, कागदपत्रे आणि अभिलेखांमध्ये या जलसागराचा उल्लेख "छत्रपती शिवाजी महाराज कोयना जलसागर" असाच केला जाईल.
कोयना धरण हे पश्चिम महाराष्ट्रासाठी वरदान ठरले आहे. शेती, पाणीपुरवठा आणि वीज निर्मिती या तीनही बाबतीत कोयनेचे योगदान मोठे आहे. गेल्या अनेक दशकांपासून लाखो लोकांच्या जीवनाशी हे धरण जोडले आहे. आता छत्रपती शिवाजी महाराजांचे नाव या जलसागराला जोडल्यामुळे त्याचे ऐतिहासिक आणि सांस्कृतिक महत्त्व आणखी वाढणार आहे. या निर्णयामुळे राज्यातील जनतेमध्ये समाधानाचे वातावरण आहे.
या निर्णयानंतर जलसंपदा मंत्री राधाकृष्ण विखे पाटील म्हणाले कि, "कोयना जलसागराला छत्रपती शिवाजी महाराजांचे नाव देणे ही अभिमानाची बाब आहे. मुख्यमंत्री देवेंद्र फडणवीस यांनी तातडीने निर्णय घेऊन आमच्या मागणीला मान्यता दिली, त्याबद्दल मी त्यांचे मनापासून आभार मानतो." या नामांतरामुळे कोयना परिसरातील पर्यटनालाही चालना मिळण्याची अपेक्षा आहे. शासनाच्या या निर्णयाचे सर्व स्तरातून स्वागत होत आहे.
कोयना जलसागराचे नवीन नाव आता छत्रपती शिवाजी महाराज कोयना जलसागर असेल.
हा निर्णय जलसंपदा मंत्री राधाकृष्ण विखे पाटील यांच्या विनंतीनंतर मुख्यमंत्री देवेंद्र फडणवीस यांनी घेतला.
शासन निर्णय जारी झाल्याने यापुढे सर्व अधिकृत नोंदींमध्ये नवीन नावाचा वापर होईल.
कोयना धरण शेती, पाणी आणि वीजेसाठी पश्चिम महाराष्ट्रासाठी महत्त्वाचे आहे.