मुंबई- ईडीच्या अटकेत असलेले मंत्री नवाब मलिक यांचा साथीदार सुहेल खांडवानी याच्या घरावर एनआयए ने छापा टाकला आहे. खांडवानी हा १९९३ च्या मुंबई साखळी बॉंबस्फोट प्रकरणाशी संबंधित असल्याची माहिती समोर आली आहे.
कुख्यात गुंड दाऊद इब्राहिमचे हस्तक आणि निकटवर्तीयांविरोधात राष्ट्रीय तपास यंत्रणेने (एनआयए) सोमवारी पहाटे मुंबईतील २० ठिकाणांवर धडक कारवाई केली आहे. आजच्या कारवाईसाठी मुंबईतील एनआयएच्या मुख्यालयाबाहेर दोन गाड्यांमधून सीआरपीएफचे जवान आले होते. त्यानंतर सीआरपीएफ जवान एनआयएच्या पथकांबरोबर कारवाईसाठी रवाना झाले. काही छापे माहीम परिसरात टाकण्यात आले. माहीम दर्ग्याचे ट्रस्टी सुहेल खंडवानी यांच्या घरावर एनआयएने छापा टाकला असून त्याठिकाणी सध्या झाडाझडती सुरु आहे.
राष्ट्रवादी काँग्रेसचे नेते नवाब मलिक यांच्यावर कारवाई झाल्यानंतरच सुहेल खंडवानी यांचे नाव सातत्याने पुढे येत होते. त्यांच्यावरही कारवाई होण्याची शक्यता वर्तविली जात होती. अखेर एनआयएने सोमवारी पहाटे चार वाजता सोहेल खंडवानी यांच्या घरावर छापा टाकला. सुहेल खंडवानी यांच्या घरात सध्या एनआयएच्या अधिकाऱ्यांकडून शोध मोहीम सुरु आहे. याशिवाय, माहीम परिसरात राहणाऱ्या १९९३ च्या बॉम्बस्फोट खटल्यातील आरोपीच्या घरावरही एनआयचे पथक पोहोचले आहे.
२० ठिकाणांमध्ये शार्प शूटर, तस्करांचा हात आहे. याशिवाय अनेक ऑपरेटर्सवरही छापे टाकण्यात आले आहेत. असं सांगण्यात येतंय की, मुंबईत एनआयएची कारवाई सुरु आहे. मुंबईच्या नागपाडा, गोरेगाव, बोरीवली, सांताक्रूझ, मुंब्रा, भेंडी बाजारात छापेमारी सुरु झाली आहे. दाऊदशी संबंधित अनेक हस्तक, ड्रग स्मगलर आणि असे अनेक लोक आहेत.
राष्ट्रीय तपास यंत्रणेने फेब्रुवारी महिन्यात दाऊद इब्राहिम आणि त्याच्या सहकाऱ्यांवर गुन्हा दाखल केला होता. त्यानंतर एनआयए सातत्याने दाऊदशी संबंधित मालमत्तांवर कारवाई करताना दिसत आहे. आजची कारवाईही त्याचाच एक भाग आहे.
