पुण्यात राज्य उत्पादन शुल्क विभागाकडून मोठी कारवाई करण्यात आली आहे. राज्य उत्पादन शुल्काच्या सासवड विभागाने अवैध दारू साठा जप्त केला असून याप्रकरणी एका व्यक्तीला ताब्यात घेण्यात आले आहे. गोव्यातील बनावटी मद्याची तस्करी पुण्यातून होणार असल्याची माहिती उत्पादन शुल्क विभागाला मिळाली होती, त्यात अनुषंगाने ही कारवाई करण्यात आली आहे.
ही दारू गोवा बनावटीची असून याची किंमत तब्बल सव्वा कोटी रुपये इतकी आहे. हा सर्व मुद्देमाल घेऊन जालन्याच्या दिशेने एक ट्रक निघाला असल्याची गोपनीय माहिती अधिकाऱ्यांना मिळाली होती. त्याच अनुषंगाने राज उत्पादन शुल्क विभागाच्या अधिकाऱ्यांनी चेक पोस्ट वर सर्व वाहनांची तपासणी सुरू केली. या दरम्यान वाहन क्र. एचआर ६३ डी ८८७८ हा ट्रक खेडशिवापूर टोल नाक्यावर अडवण्यात आला. चालकाला ट्रक मध्ये काय आहे अशी विचारणा केली असता त्याने संशयास्पद उत्तर दिली. त्यामुळे या ट्रकची तपासणी केली असता हा मद्य साठा आढळून आला. गोवा राज्यात बनवल्या जाणाऱ्या आणि विक्री होणाऱ्या रॉयल ब्लु माल्ट व्हिस्कीच्या १८० मिली क्षमतेच्या ७९.६८० सिलबंद बाटल्या (१६६० बॉक्स), रॉयल ब्लु माल्ट व्हिस्कीच्या ७५० मिली क्षमतेच्या ६४८० सिलबंद बाटल्या (५४० बॉक्स) आढळून आल्या. हा सर्व मद्य साठा, एक ट्रक आणि एक मोबाईल फोन असा १,५१,०६,६००/- किंमतीचा मुददेमाल जप्त करण्यात आला असून वाहनचालक सुनिल चक्रवर्ती याला अटक करण्यात आली आहे.
महाराष्ट्र दारुबंदी कायदा १९४९ चे कलम ६५ (अ) (ई), ८०, ८१, ८३, ९०, व १०८ अन्वये सासवड विभागाने गु. र. क्र. १५७/२०२४ दि. १०/०७/२०२४ नुसार गुन्हा नोंद करण्यात आला आहे. याप्रकरणी राज्य उत्पादन शुल्क विभागाचे अधीक्षक चरणसिंह राजपूत यांनी सविस्तर माहिती दिली आहे.