बुलढाणा : बुलढाण्यामधून (Buldhana Crime) एक धक्कादायक बातमी समोर आली आहे. यामध्ये आरोपीने अनैतिक संबंधात अडसर ठरणाऱ्या जिवलग मित्राचा काटा काढला आहे. ही घटना बुलढाणा जिल्ह्यातील लोणार तालुक्यातील पळसखेड या ठिकाणी घडली आहे. राजाराम जायभाये असे मृत तरुणाचे नाव आहे तर संतोष थोरवे असे आरोपी मित्राचे नाव आहे.
काय आहे संपूर्ण प्रकरण?
राजाराम जायभाये आणि संतोष थोरवे हे एकमेकांचे चांगले जिवलग मित्र होते. त्यामुळे संतोष यांचे राजारामच्या घरी जाणे-येणे होते. त्यातच राजारामच्या पत्नीसोबत संतोषची जवळीक वाढली होती. 28 ऑक्टोबर रोजी संध्याकाळी राजाराम हा संतोषच्या शेतात ट्रॅक्टरने नांगरणी करण्यासाठी गेला. मात्र तो घरी न परतल्याने शोधाशोध केली असता राजाराम जायभाये (वय 30) हा संतोष थोरवेच्या शेतात 29 ऑक्टोबरला मृत अवस्थेत आढळून आला. यानंतर राजाराम जायभाये यांनी शेतात आत्महत्या केल्याची बातमी संपूर्ण गावात पसरली.
मात्र यादरम्यान मृत तरुणाचे वडील गजानन आनंदराव जायभाये यांनी राजारामची पत्नी व संतोष थोरवे यांच्या अनैतिक संबंधात राजाराम अडचण ठरत असल्याने संतोष थोरवे यांनीच गळा दाबून राजारामचा खून केल्याची फिर्याद लोणार पोलीस स्टेशनमध्ये दिली. गजानन यांच्या फिर्यादीवरुन लोणार पोलिसांनी आरोपी संतोष मदन थोरवे (वय 34 पळसखेड) याला शिताफीने अटक करून त्याच्याविरुद्ध भादवी कलम 302 अन्वये पुन्हा दाखल करून त्याला अटक केली आहे. सदर घटनेचा पुढील तपास उपविभागीय पोलीस अधिकारी प्रदीप पाटील यांच्या मार्गदर्शनाखाली पोलीस उपनिरीक्षक राजाभाऊ घोगरे सहाय्यक पोलीस निरीक्षक युवराज रबडे, पोलीस कर्मचारी संजय जाधव ,नितीन खराडे गणेश लोंढे, ज्ञानेश्वर शेळके करीत आहेत.
