नागपूर : आपण अनेकदा एखाद्याच्या भूल थापांना बळी पडतो. त्यामुळे अनेकदा आपली आर्थिक फसवणूक (Nagpur Crime News) केली जाते. नागपूरमध्ये काहीसा असाच प्रकार (Nagpur Crime News) घडला आहे. यामध्ये स्वतःला नासाचे शास्त्रज्ञ म्हणवत एका तरुणाने तब्बल 111 बेरोजगार तरुणांना नासामध्ये नोकरी मिळवून देण्याचे आमिष दाखवून त्यांना 5.31 कोटींचा चुना लावला आहे.
काय आहे नेमके प्रकरण?
आरोपीचे नाव ओमकार महेंद्र तलमले असे आहे. त्याने 25 जुलै 2023 रोजी पैशांचे आमिष दाखवून कोंढाळीजवळ काही गुंडांच्या मदतीने नागपूर शहरातील दोन व्यावसायिकांचे अपहरण केले. त्यानंतर अमरीश देवदत्त गोळे आणि निरलकुमार जयप्रकाश सिंग यांचे खून करून त्यांचे मृतदेह वर्धा जिल्ह्यातील नदीत फेकून दिले. याप्रकरणी नागपूर ग्रामीण पोलिसांनी ओमकारला अटक केली आहे. त्यानंतर हा फसवणुकीचा प्रकार समोर आला आहे.
ओमकारने अनेक तरुणांना बनावट नियुक्तीपत्रेही पाठवली होती. नासामध्ये नोकरी मिळवून देण्याच्या नावाखाली त्याने अनेक युवकांची फसवणूक केली आहे. मनीषनगर जयदुर्गा सोसायटी एकदंता अपार्टमेंटमधील रहिवासी अश्विन अरविंद वानखेडे आणि ओमकार तलमले हे एकाच ढोल-ताशा पथकातील असल्याने त्यांची ओळख होती. ओमकारने त्याला सांगितले की तो नासामध्ये ज्युनियर सायंटिस्ट म्हणून काम करतो.
यानंतर ओमकारने वाडीस्थित रिजनल रिमोट सेन्सिंग सेंटरमध्ये ऑफिस स्टाफ क्लास बी, ऑफिस अ‍ॅडमिन, सीनियर अ‍ॅडमिनची मोठ्या संख्येने रिक्त पदे आहेत. येथील अधिकाऱ्यांशी आपली चांगली ओळख असल्याचे सांगून त्याला नोकरीचे आमिष दाखवून दोन लाख रुपये बँक ऑफ बडोदाच्या खात्यात जमा करण्यास सांगितले. तुमच्या मित्रांना आणि नातेवाईकांना स्वारस्य असल्यास कळवा असेदेखील त्याने सांगितले.
यानंतर ओमकारच्या या गोड बोलण्याला भुलून अश्विन वानखेडेसह 111 जणांनी प्रत्येकी दोन लाख रुपये त्याच्या वेगवेगळ्या बँक खात्यांमध्ये जमा केले. त्याने प्रत्येकाच्या ई-मेलवर बनावट नियुक्तीपत्रे पाठवली. यानंतर हे सगळेजण वाडीच्या प्रादेशिक सुदूर संवेदन केंद्रात रुजू होण्यासाठी गेले असता त्यांनी बनावट नियुक्तीपत्र सादर केले. मात्र तिथे त्यांना ओमकार तलमले सारख्या व्यक्तीला ओळखत नसल्याचे सांगण्यात आले. यानंतर आपली फसवणूक झाल्याचे लक्षात येताच सर्व पीडित बेरोजगारांनी आर्थिक गुन्हे शाखा अर्चित चांडक यांची भेट घेऊन त्यांना घडलेला सर्व प्रकार सांगितला. यानंतर अर्चित चांडक यांच्या आदेशावरुन बजाजनगर पोलिस ठाण्याचे सहायक पोलिस निरीक्षक सचिन जाधव यांनी ओमकारविरुद्ध गुन्हा दाखल केला.
