मुंबई : मुंबईच्या वांद्रे-वरळी सी-लिंकवरून (Sea Link Suicide) 31 जुलै रोजी एका व्यक्तीने समुद्रात उडी घेऊन आत्महत्या केली होती. हेलिकॉप्टरच्या सहाय्याने या व्यक्तीचे सर्च ऑपरेशन (Sea Link Suicide) सुरु होते. मुंबई पोलीस, नौदल आणि कोस्ट गार्ड एकत्रितपणे त्या व्यक्तीचा शोध घेत होते. अखेर त्या व्यक्तीचा मृतदेह आज सकाळी दादर चौपाटी जवळ आढळून आला आहे. टिकम माखिजा असे आत्महत्या करणाऱ्या व्यक्तीचे नाव होते. ते पेशाने व्यापारी होते.
काय घडले होते?
31 जुलै रोजी सकाळी वांद्रे वरळी सी लिंकच्या बरोबर मध्यभागी टिकम माखिजा यांनी आपली कार थांबवली आणि समुद्रात उडी मारली. या घटनेची माहिती मिळताच मुंबई पोलीस, भारतीय नौदल आणि तटरक्षक दलानं हेलिकॉप्टरच्या मदतीनं शोधमोहीम सुरू केली होती. सी लिंकवर उभ्या असलेल्या कारमधील कागदपत्रांच्या आधारे पोलिसांना माखिजा यांची ओळख पटली.
टिकम माखिजा हे मुंबईच्या पश्चिम उपनगरातील खार परिसरात व्यवसाय करायचे. या प्रकरणी ADR अंतर्गत गुन्हा दाखल करण्यात आला आहे. माखिजा यांचा मृतदेह पोस्टमॉर्टमसाठी पाठवण्यात आला आहे, अशी माहिती मुंबई पोलिसांकडून देण्यात आली आहे. त्यांनी नेमकी कोणत्या कारणामुळे आत्महत्या केली हे मात्र अद्याप समजू शकलेले नाही याचा तपास पोलीस करत आहेत.
