पुणे : पुणे -सोलापूर महामार्गावर आज सकाळी टँकरने दुचाकीला मागून धडक दिल्यामुळे आईचा जागीच मृत्यू (Pune Accident) झाला तर मुलगी गंभीर जखमी आहे. ही घटना (Pune Accident) सकाळी 8 वाजण्याच्या सुमारास घडली. पुणे – सोलापूर महामार्गाच्या जवळ असलेल्या कुंजीरवाडी ग्रामपंचायतच्या हद्दीतील आळंदी म्हातोबाची गावाकडे जाणाऱ्या चौकात हा भीषण अपघात घडला आहे.या अपघातामध्ये योगिता राजकुमार गव्हाणे (वय- 35 रा. होले कॉम्प्लेक्स, उरुळी कांचन, ता. हवेली) यांचा जागेवरच मृत्यू झाला तर मृत महिलेची मुलगी सुरेखा राजकुमार गव्हाणे (वय 16) ही अपघातात गंभीर जखमी झाली असून तिच्यावर कुंजीरवाडी जवळच्या एका खासगी रुग्णालयात उपचार सुरू आहेत.
काय घडले नेमके?
योगिता आणि सुरेखा माय लेकी आहेत. नेहमी प्रमाणे आज बुधवारी सकाळी ते दररोज प्रमाणे, योगिता शेवाळेवाडी या ठिकाणी दुचाकीवर कामासाठी निघाल्या होत्या. त्याचवेळी त्यांची मुलगी देखील त्यांच्याबरोबरच निघाली होती. त्या नायगाव चौकात आल्या असतांना त्यांच्या दुचाकीला पाठीमागून येणाऱ्या एका पेट्रोल डिझेलच्या टँकरने जोरदार धडक दिली. या अपघातात दुचाकी चालवणाऱ्या योगिता गव्हाणे या रस्त्यावर खाली कोसळल्या. यामध्ये त्यांच्या डोक्याला जबर मार लागल्याने त्यांचा जागीच मृत्यू झाला. तर त्यांची मुलगी सुरेखा गंभीर जखमी झाली.
दरम्यान, या अपघाताची (Pune Accident) माहिती मिळताच अपघात ग्रस्तांना कुंजीरवाडीचे पोलीस पाटील मिलिंद कुंजीर ,कदम रुग्णवाहिकेचे वैभव कदम,आणि त्यांच्या सहकाऱ्यांनी तात्काळ रुग्णालयात दाखल केले. या अपघातामुळे पुण्याकडे येणारी वाहतूक काही काळ विस्कळीत झाली होती. मुलीच्या डोळ्यांदेखत आईचा जीव गेल्याने सगळीकडे हळहळ व्यक्त केली जात आहे.
