लोणावळा- पुणे- मुंबई द्रुतगती मार्गावर आज, मंगळवारी सकाळी चार वाहने एकामेकाना धडकल्याने झालेल्या भीषण अपघातात चार जणांना आपले प्राण गमवावे लागले तर पाच जण गंभीर जखमी झाले. हा अपघात आज सकाळी 6 वाजून 50 मिनिटांनी बोरघाटात घडला.
महामार्ग पोलिसांनी दिलेल्या माहितीनुसार, पुण्याहून मुंबईच्या दिशेने जाणाऱ्या महामार्गावर दोन मार्गिकेमधून दोन कंटेनर जात होते. त्यावेळी मागील छोट्या वाहनांना पुढे जाण्यासाठी जागाच राहिली नव्हती. या दोन कंटेनरमधून वेन्यू कारने पुढे जाण्याचा प्रयत्न केला. त्यात दोन कंटेनरमध्ये ही कार चेपली गेली . त्यात कारचा चक्काचूर झाला. पुण्यातील या गाडीमधील चौघांचा जागीच मृत्यु झाला. तर तिच्या मागोमाग येणारी आणखी एक कार त्यांना धडकली. एक ट्रक, एक आयशर टेम्पो आणि स्विफ्ट व वेन्यू कार अशी चार वाहने या अपघातात सापडली आहेत.
त्यात 5 जण किरकोळ जखमी झाले असून त्यांना पनवेलच्या एमजीएम हॉस्पिटलमध्ये दाखल करण्यात आले आहे. या अपघाताची माहिती मिळताच घटनास्थळी महाराष्ट्र सुरक्षा दल, देवदूत रेस्क्यु टीम आणि खोपोली, खंडाळा महामार्ग पोलीस दाखल झाले. या अपघाताने मुंबईकडे जाणाऱ्या मार्गावरील वाहतूक ठप्प झाली होती. पोलिसांनी क्रेनच्या सहाय्याने ही वाहने बाजूला करुन वाहतूक सुरळीत करण्याचे प्रयत्न सुरु केले.
