जगभरात आपल्या संस्कृती आणि परंपरेसाठी प्रसिद्ध असलेला भारत धार्मिक स्थळ म्हणूनही खूप लोकप्रिय आहे. दरवर्षी अनेक लोक केवळ सुंदर पर्यटनस्थळांना भेट देण्यासाठी येत नाहीत, तर येथे असलेली मंदिरे पाहण्यासाठी देखील येथे पोहोचतात. या मंदिरांपैकी एक तिरुपती बालाजी देखील जगभरात खूप प्रसिद्ध आहे. दरवर्षी देश-विदेशातील लोक मोठ्या संख्येने येथे दर्शनासाठी येतात. नुकतेच आयआरसीटीसीने तिरुपती बालाजीसाठी खास टूर पॅकेज जारी केले आहे. चला तर मग जाणून घेऊया या पॅकेजशी संबंधित सर्व आवश्यक तपशील
प्रवास कधी सुरू होणार ?
आयआरसीटीसीने जारी केलेल्या या टूर पॅकेजचा कालावधी तीन रात्र आणि चार दिवसांचा असेल. हा प्रवास २१ मार्चपासून सुरू होणार असून या तारखेपासून २६ मार्चपर्यंत तुम्हाला दररोज गाडी मिळणार आहे. आपण आपल्या सोयीनुसार प्रवासाची तारीख निवडू शकता. या खास टूर पॅकेजला तिरुपती बालाजी दर्शन एक्स मुंबई असे नाव देण्यात आले आहे. हे टूर पॅकेज मुंबईहून सुरू होईल म्हणजेच तुम्हाला तिरुपती बालाजीला जाणारी मुंबई ट्रेन मिळेल.
असे असेल प्रवासाचे वेळापत्रक
या टूर पॅकेजअंतर्गत तुम्ही एमजीआर चेन्नई सेंट्रल सुपरफास्ट एक्स्प्रेसने प्रवास कराल. भारतीय रेल्वेच्या या टूर पॅकेजची सुरुवात मुंबईतून होणार आहे. पण मुंबईव्यतिरिक्त पुणे आणि सोलापूरयेथूनही ही गाडी पकडता येणार आहे. या यात्रेअंतर्गत तुम्हाला आंध्र प्रदेशातील तिरुपती बालाजीचे दर्शन घेता येईल आणि प्रवास संपल्यानंतर तुम्हाला पुन्हा मुंबई, पुणे किंवा सोलापूर स्थानकावर सोडले जाईल.
भाडे किती असेल ?
भाड्याबद्दल बोलायचे झाले तर आयआरसीटीसीने तिरुपती बालाजीसाठी जारी केलेल्या या पॅकेजचे भाडे अत्यंत कमी ठेवले आहे. या प्रवासाअंतर्गत तुम्हाला ट्रेनमध्ये थर्ड एसी आणि स्लीपर कोचमध्ये प्रवास करता येणार आहे. जर तुम्ही थर्ड एसी बुक करत असाल तर त्यासाठी तुम्हाला एका व्यक्तीसाठी 12100 रुपये, दोन व्यक्तींसाठी 10400 रुपये आणि तीन लोकांसाठी 10300 रुपये मोजावे लागतील. तर जर तुम्हाला स्लीपर तिकीट मिळत असेल तर तुम्हाला एका व्यक्तीसाठी 9050 रुपये, दोन व्यक्तींसाठी 7390 रुपये आणि तीन लोकांसाठी 7290 रुपये मोजावे लागतील.
टूर पॅकेजमध्ये मिळणार ‘या’ सुविधा
आयआरसीटीसीच्या या टूर पॅकेजसाठी निश्चित करण्यात आलेल्या भाड्याबरोबरच तुम्हाला अनेक सुविधाही मिळणार आहेत. या सुविधांमध्ये रेल्वे भाडे, तिरुपतीमध्ये एक रात्रीचा हॉटेल मुक्काम, एक वेळचे जेवण आणि नाश्ता, प्रेक्षणीय स्थळे, बालाजी मंदिर दर्शन पास, लोकल टूर गाईड, ट्रॅव्हल इन्शुरन्स, जीएसटी आदी सुविधांचा समावेश आहे. प्रवासाशी संबंधित सविस्तर माहितीसाठी तुम्ही आयआरसीटीसीच्या अधिकृत वेबसाइटला भेट देऊ शकता. याशिवाय माहिती किंवा बुकिंगसाठी ही तुम्ही आयआरसीटीसीच्या कार्यालयात जाऊ शकता.